ބްރަދާސް އެކަޑަމީގެ ފަރާތުން އިންތިޒާމުކޮށް ކުރިއަށް އޮތް ބޮޑުއީދު ބަންދާއި ދިމާކޮށް ދ.ކުޑަހުވަދޫގައި ބާއްވާ "ބޮޑުއީދު ފުޓްސަލް ޗެލެންޖް 1446" ގައި ބައިވެރިވުމުގެ މުއްދަތު އިތުރުކޮށްފިއެވެ.

ބްރަދާސް އެކަޑަމީގެ ޗެއާޕާސަން އިސްމާއިލް އާދިލް ވޮއިސް ސްޕޯޓްސްއަށް މައުލޫމާތުދިންގޮތުގައި ކުރިން އޮތީ މިމަހުގެ ހަތަރުވަނަ ދުވަހުގެ ރޭ 12:00 ގެ ނިޔަލަށް މުއްދަތު ހަމަވާގޮތަށެވެ. ނަމަވެސް ގިނަ ޓީމުތަކެއްގެ އެދުމުގެ މަތިން މިހާރު ވަނީ މިމަހުގެ ހަވަނަ ދުވަހުގެ ނިޔަލަށް މުބާރާތުގައި ބައިވެރިވުމުގެ މުއްދަތު އިތުރުކޮށްފައެވެ.

އިތުރަށް ވާހަކަދައްކަމުން އާދިލް ބުނީ ބްރަދާސް އެކަޑަމީގެ ފަރާތުން މިފަދަ މުބާރާތެއް ބާއްވަން ނިންމީ އީދު ބަންދާއި ދިމާކޮށް ރަށުގެ ޒުވާނުންގެ މެދުގައި ގުޅުން ބަދަހިކޮށް އެކުވެރި މާހައުލެއްގައި އީދުގެ އުފާ ހާސިލްކުރުމުގެ މަގުސަދުގައެވެ.

Advertisement

ޗެންޕިއަން ޓީމަށް 25،000 އަދި ރަނަރަޕް ޓީމަށް 12،000 ރުފިޔާގެ ފައިސާގެ އިންމު ހުށަހަޅާފައިވާ މިމުބާރާތުގެ ރަޖިސްޓްރޭޝަން ފީއެއްގެ ގޮތުގައި 1500 ރުފިޔާގެ ފީއެއް ނެގުމަށް ވަނީ ހަމަޖެހިފައެވެ.

ބްރަދާސް އެކަޑަމީއަކީ ކުޑަހުވަދޫގައި ކުޅިވަރު ކުރިއެރުވުމަށް މިހާރު ވެސް ގިނަ ހަރަކާތްތަކެއް ހިންގަމުންދާ ވަރަށް ހިންގުންތެރި އެކަޑަމީއެކެވެ. އެގޮތުން މިހާރު ވެސް އެއެކަޑަމީގެ ފަރާތުން އަންނަނީ ކުޑަހުވަދޫގައި ފުޓްބޯޅަ އަދި ފުޓްސަލްގެ އިތުރުން އަންހެން ހޭންޑްބޯޅަ ވައިޑީޕީ ޕްރޮގްރާމް ހިންގަމުންނެވެ.