އިސްރާއިލުން ޣައްޒާގައި ހިންގަމުންދާ ޤަތުލްޢާއްމު ފަސްއަހަރު ދުވަހަށް މެދުކަނޑާލަން ހަމާސް އިން ހުށަހެޅި ހުށަހެޅުމަށް އިސްރާއިލުން ދެކޮޅު ހަދައިފިއެވެ. 

ހަމާސްގެ އިސް އޮފިޝަލެއް ކަމަށްވާ އަބްދުއްރަހްމާން ޝަދީދު ވިދާޅުވީ، ފަސްއަހަރަށް ޤަތުލްއާއްމު މެދުކަނޑާލަން ހުށަހެޅި ހުށަހެޅުމުގައި ހިމެނެނީ ވަގުތުން ހަނގުރާމަ ހުއްޓާލުމާއި، ހުރަހެއްނެތި އިންސާނީ އެހީ ފޯރުކޮށްދިނުމާއި، ޣައްޒާ އަލުން އާރާސްތުކުރުމާއި، އަދި ޣަދި ޣައްޒާ ހިންގުމަށް މިނިވަން އިދާރީ ކޮމިޓީއެއް އުފެއްދުމެވެ.

"ހައްދުފަހަނައަޅާފައިވާ ނެތަންޔާހޫގެ ސަރުކާރުން ހަމާސްގެ ހުށަހެޅުން ބަލައިނުގަތް. ހަނގުރާ ނިންމުމަށް އެއްބަސްނުވެ، ޣައްޒާގައި ހިފަހައްޓާފައިވާ އިސްރާއިލު ގައިދީންގެ މައްޗަށްވެސް ވިސްނާލުމެއް ނެތި އޭނާ ދެކޮޅުހެދީ،" ޝަދީދު ހަމާސްގެ ރަސްމީ ޕްލެޓްފޯމްތަކުގައި ޝާއިޢުކުރި ބަޔާނެއްގައި ބުނެފައިވެއެވެ.

ހަމާސްއިން ބުނާ ގޮތުގައި، އެ ޖަމާޢަތުން މެދުވެރިންނާއެކު އެއްބާރުލުން ދިނުމަށް ތައްޔާރަށް ތިބިކަން އަންގާފައިވެއެވެ. އަދި އެއްބަސްވުމުގައި ދާއިމީ ގޮތެއްގައި ހަނގުރާމަ ހުއްޓާލުން ހިމެނެންޖެހޭނެ ކަމަށް ބުނެފައިވާ ކަމަށްވެސް ބުންޏެވެ. 

މީގެއިތުރުން، ހަމާސްއިން ބުނީ އެމެރިކާ އާއި އެ ޤައުމުގެ ބައިވެރިން ޣައްޒާގައި ހިންގާ "އަނިޔާވެރިކަމާއި، ނަސްލު ނައްތާލުމާއި، ބަނޑަށްޖެއްސުމުގެ ހަނގުރާމައިގައި" ބައިވެރިވާކަމަށެވެ.

އިސްރާއިލުގެ އަންދާޒާތަކުން ދައްކާ ގޮތުގައި މިވަގުތު ޣައްޒާގައި 59 އެމީހުންގެ ގައިދީން އެބަ ތިއްބެވެ. އަދި، 9،500 އަށްވުރެ ގިނަ ފަލަސްތީނުގެ ރައްޔިތުން އިސްރާއިލުގެ ޖަލުތަކުގައި ބަންދުކޮށްފައިވެއެވެ. އިންސާނީ ޙައްޤުތަކުގެ ޖަމްޢިއްޔާތަކުން ރިޕޯޓުކުރާ ގޮތުގައި މި ގައިދީންނަށް އަނިޔާކުރުމާއި، ކާންނުދިނުމާއި، ސިއްޙީ އިހުމާލުވުން ފަދަ ކަންކަން ފުޅާ ދާއިރާއެއްގައި ހިނގަމުންދެއެވެ.