ދިރާސީ އާ އަހަރުގެ އޮނިގަނޑަށް އަދުގެ ސަރުކާރުން ގެންނަވަން ނިންމަވާފައިވާ ބަދަލަކުން، ފަތުރުވެރިކަމުގެ ސިނާޢަތުގައި މަސައްކަތްކުރާ ދިވެންހިންނަށް އެއްވެސް ދައްޗެއް ނުވާނެކަމަށް ތަޢުލިމާބެހޭ ވަޒީރު ޑރ. ޑރ.އިސްމާޢީލް ޝަފީޢު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރައްޔިތުން މަޖިލީހުގެ ހިތަދޫ ދެކުނު ދާއިރާގެ ޢިއްޒަތްތެރި މެންބަރ އިބްރާހިމް ނާޒިލު އަމާޒުކުރެއްވި ސުވާލަކަށް ޖަވާބު ދެއްވަމުންނެވެ.

ނާޒިލުގެ ސުވާލުގައި، ދިރާސީ އާ އަހަރުގެ އޮނިގަނޑަށް މި ގެނެވުނު ބަދަލަކީ ވަރަށް ބޮޑަށް ރިސޯޓްތަކުގެ މުވައްޒަފުންނަށް އަމާޒުކުރެވިގެން ގެނެވޭ ބަދަލެއްކަމަށާއި، ރިސޯޓް މުވައްޒަފުންގެ އޮފް ސީޒަނަށް ދިމާވާގޮތަށް ކޮށްފައިވާކަމެއްކަމަށާއި، އިހުއޮތް ބޯދާ ގޮތަށް ބަދަލުކުރެއްވުމުގެ ޙިކްމަތަކީ އަދި އެކަމުގައި އޮތް ފައިދާއަކީ ކޮބައިތޯ ވެސް ވަޒީރުކުރެން އައްސަވާފައިވެއެވެ.

މި ސުވާލުތަކުގެ ޖަވާބު ދެއްވަމުން ވަޒީރު ޑރ. ޑރ.އިސްމާޢީލް ޝަފީޢު ވިދާޅުވިގޮތުގައި، ރާއްޖޭގެ ފިސްކަލް އަހަރު ފެށިގެން އަންނަނީ އަހަރުގެ ޖެނުއަރީ މަހުން ކަމުގައި ވީއިރު، ބަޖެޓް ސިސްޓަމް އެތުރިފައިވާ ގޮތުން، ޖޫން/ޖުލައި ގައި ބޮޑު ޗުއްޓީ ދިނުމަށްފަހު އޯގަސްޓްމަހު އައު ދިރާސީ އަހަރެއް ފެއްޓުމުގައި ސްކޫލުތަކަށް ވަރަށް ބޮޑެތި ގޮންޖެހުންތަކެއް ކުރިމަތިވެއެވެ.

އިތުރަށް ޖަވާބު ދެއްވަމުން ވަޒީރު ވިދާޅުވިގޮތުގައި މި ގެންނަ ބަދަލުން، ރިސޯޓްތަކުގައި މަސައްކަތްކުރާ ދިވެހީންނަކަށް އެއްވެސް ދައްޗެއް ނާންނާނެކަމަށާއި، މިބަދަލު އިންތިޒާމު ކުރެވި ހަމަޖެހިގެން އަންނާނީ އެ ދަތި އުނދަގޫ ނާންނާނެ ފަދަގޮތަކަށްކަމަށް ވަޒީރު ޔަޤީންކަން ދެއްވާފައިވެއެވެ.

ރާއްޖޭގައި 2021 އިން ފެށިގެން ދިރާސީ އައު އަހަރު ފެށިގެން އަންނަނީ އޯގަސްޓް މަހުއެވެ. ނަމަވެސް 2024 އަހަރުގެ ޖެނުއަރީ މަހު ތެރޭގައި 2026 ވަނަ އަހަރުން ފެށިގެން ދިރާސީ އާ އަހަރުގެ ކިޔެވުން ޖެނުއަރީ މަހު ފަށާ ގޮތަށް ބަދަލު ގެންނަވަން ވަޒީރުންގެ މަޖިލީހުންވަނީ ފާސްކުރައްވާފައެވެ.

މި ބަދަލާއެކު 2025 ވަނަ އަހަރު ޑިސެމްބަރު މަހު ބޮޑު ޗުއްޓީ ލިބޭނެ ކަމަށާއި ޖުލައި މަހު 3 ހަފްތާގެ ޗުއްޓީއެއް އަދި ޑިސެމްބަރު މަހު 4 ހަފްތާގެ ޗުއްޓީއެއް ދަރިވަރުންނަށް ލިބިގެންދާނެ ރައީސް އޮފީހުން ވަނީ ބުނެފައެވެ.