އިންޑިއާ އާ ގުޅުން ގޯސްވެފައިވާ މި ދަނޑިވަޅުގައި ޕާކިސްތާނުގެ ރައީސް އާސިފް އަލީ ޒަރުދާރީ އާ, އެޤައުމުގައި ހުންނަ ޗައިނާ ސަފީރު ޖިއާންގ ޒައިދޯންގެ ހާއްސަ ބައްދަލުވުމެއް މިއަދު ބާއްވަވައިފިއެވެ.

މި ބައްދަލުވުން ކުރިއަށް ގެންގޮސްފައިވަނީ ޕާކިސްތާނުގެ ރައީސް ދިރިއުޅުއްވާ ރަސްމީ ގެކޮޅުގައެވެ. މި ބައްދަލުވުމާ ބެހޭގޮތުން ޕާކިސްތާނުގެ މީޑިއާތަކުން ބުނެފައިވަނީ، މިއީ ޕާކިސްތާނާ ޗައިނާ އާ ދެޤައުމުގެ ދެމެދުގައި އޮންނަ ވިޔަފާރިއާއި އެނޫންވެސް ގުޅުންތައް އިތުރަށް ބަދަހިކުރުމާ ގުޅޭގޮތުން މަޝްވަރާކޮށްލުމަށް ކުރިއަށްގެންދިޔަ ބައްދަލުވުމެއް ކަމަށެވެ. މި ބައްދަލުވުމުގައި ޕާކިސްތާނުގެ ރައީސް އާސިފް އަލީ ޒަރުދާރީ ވަނީ އެންމެފަހުން ކަޝްމީރުގައި ހިނގާދިޔަ ހާދިސާއަށްފަހު، އިންޑިއާއިން އެޤައުމާމެދު އަމަލުކުރަމުން އަންނަ ގޮތުގެ ކަންބޮޑުވުން ޗައިނާ ސަފީރާ ހިއްސާކޮށްފައެވެ.

މި ބައްދަލުވުމުގައި ރައީސް ޒަރުދާރީ ވަނީ އިންޑިއާ އާއި ޕާކިސްތާނާ ދެމެދު އޮތް ގުޅުން ގޯސްކުރުމަށް އިންޑިއާއިން މަސައްކަތްކުރަމުންދާކަމަށް ވިދާޅުވެފައެވެ. އެގޮތުން އިންޑިއާގެ އަމަލުތައް މިހާރު ހުރީ ސަރަހައްދަށްވެސް ނުރައްކާވާފަދަ ގޮތަކަށްކަމަށް ޒަރުދާރީ ވިދާޅުވެފައިވާކަމަށް ޕާކިސްތާނުގެ ނޫސްތަކުން ވަނީ ބުނެފައެވެ.

މި ބައްދަލުވުމުގައި ޗައިނާ ސަފީރު ވަނީ ޕާކިސްތާނަކީ އެޤައުމާ ވަރަށް ގާތްގުޅުމެއް އޮންނަ ޤައުމެއްކަށް ހަނދާންކޮށްދީ، ދެޤައުމުގެ ދެމެދު އޮތް ގުޅުން ގުޅިފައިވާ ދަގަނޑު ގަނޑެއްގެ ގޮތުގައި ސިފަކުރައްވައި ވާހަކަދައްކަވާފައެވެ. އެގޮތުން ޕާކިސްތާނަށް އެންމެ އުނދަގޫ ދަނޑިވަޅުތަކުގައި އެހީވުމަށް އެޤައުމުން އަބަދުވެސް އޮންނާނޭކަމަށް ޗައިނާ ސަފީރު ޖިއާން ވިދާޅުވެފައިވާަކަމަށް ޕާކިސްތާނުގެ ނޫސްތަކުން ބުނެފައިވެއެވެ. 

މި ބައްދަލުވުމުގައި ޕާކިސްތާނުގެ ރައީސް ޒަރުދާރީވަނީ އެޤައުމާއެކު ޗައިނާ އޮތްކަމަށްޓަކައި އެޤައުމަށް ޝުކުރު އަދާކުރައްވައި އެކަން ފާހަގަކުރައްވާފައެވެ.