ވަގަށް ސިނގިރޭޓް އެތެރެކުރި މައްސަލައެއްގައި ތިން ބިދޭސީން ހައްޔަރުކޮށްފިއެވެ. 

ފުލުހުން ބުނީ، ރޭގެ ވަގުތެއްގައި، ވެރިރަށް މާލޭ ބޮޑު ރަސްގެފާނުމަގުން، ޕިކަޕެއްގައި ދިޔަ ބަޔަކު، ފުލުހުން ފެނުމާއެކު ކަޅު ދަބަސްތަކެއް މަގުމައްޗަށް ދޫކޮށްލުމަށްފަހު ފިލިކަމަށެވެ. 

އަދި، އެ ދަބަސްތައް ފުލުހުން ބެލިއިރު އޭގައި 221 ކާޓަން ސިނގިރޭޓް ހުރި ކަމަށް ފުލުހުން ބުނެއެވެ. އެ ތަކެއްޗަކީ ރާއްޖެއަށް ވަގަށް އެތެރެކޮށްފައިވާ ތަކެތިކަމަށް ބެލެވޭ ކަމަށާއި، މި މައްސަލައާ ގުޅިގެން ބިދޭސީ ތިން މީހަކު ހައްޔަރުކޮށްފައިވާކަމަށްވެސް ފުލުހުން ބުނެފައިވެއެވެ.

Advertisement

މި މައްސަލަ ދަނީ އިތުރަށް ތަޙުޤީޤު ކުރެވެމުންކަމަށްވެސް އެ އިދާރާއިން ހާމަކޮށްފައިވެއެވެ.

ދިވެހިރާއްޖޭގެ މުޖުތަމަޢު ދުންފަތުގެ އިސްތިޢުމާލު ކުރުމުން ދުރުހެލިކުރުވުމަށް ބާރު އެޅުމުގެ ގޮތުން، ދުންފަތް ކޮންޓްރޯލްކުރުމާބެހޭ ޤާނޫނަށް 2024 ވަނަ އަހަރުވަނީ އިސްލާހުތަކެއް ގެނެވިފައެވެ.

އެގޮތުން، ދުންފަތް ކޮންޓްރޯލުކުރުމާބެހޭ ޤާނޫނަށް 1 ވަނަ އިޞްލާޙު ގެނައުމުގެ ޤާނޫނުގެ ދަށުން، ދުންފަތުގެ ބާވަތްތައް ދިވެހިރާއްޖެއަށް އެތެރެކުރާ އަދި ދިވެހިރާއްޖެއިން ބޭރުކުރާ ކޮންމެ ފަރާތަކާއި، ދުންފަތުގެ ބާވަތްތައް ގަނޑުކޮށް ނުވަތަ ވަކިވަކިން ދިވެހިރާއްޖޭގައި ވިއްކާ ކޮންމެ ފަރާތެއްގެ ކިބައިގައި، ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން، މި ޤާނޫނުގެ ދަށުން މިނިސްޓްރީން ދޫކުރާ ޞައްޙަ ލައިސަންސެއް އޮންނަންވާނެއެވެ.

އަދި ހަމަ އެޤާނޫނުގެ ދަށުން، ދުންފަތުގެ ބާވަތްތައް ދިވެހިރާއްޖެއަށް އެތެރެކުރާ ކޮންމެ މީހަކު، މި ޤާނޫނުގެ ދަށުން ހަދާ ގަވާއިދުގައިވާ ގޮތުގެމަތިން ތަފްޞީލީ މަޢުލޫމާތު ރިޕޯޓެއްގެ ގޮތުގައި އެކުލަވާލައި މިނިސްޓްރީއަށް ހުށަހަޅަންވާނެކަމަށްވެސް ލާޒިމުކޮށްފައިވެއެވެ.

ދުންފަތް ކޮންޓްރޯލްކުރުމުގެ ޤާނޫނަށް ގެނައި އިސްލާހުތަކާއެކު ރާއްޖެއަށް ވަގަށް އެތެރެކުރަމުން އަންނަ ސިނގިރޭޓްގެ އަދަދުދަނީ ދުވަހަކަށްވުރެ ދުވަހެއް އިތުރުވަމުންނެވެ. އަދި މިފަދަ ޙާދިސާތައް ފެންމަތިވަމުންދަނީވެސް މަދަކުންނޫނެވެ.

އެގޮތުން، ކަނޑުމަގުން ރާއްޖެއަށް އެތެރެކުރަން އުޅުނު ޕްލައިވުޑް ޝިޕްމަންޓެއްގައި ފޮރުވައިގެން އެތެރެކުރަން މަސައްކަތް ކުރި 13 މިލިއަނަށް ވުރެ ގިނަ ސިނގިރޭޓުގެ މައްސަލައާއި، އައްޑޫ ސިޓީ ގަން އިންޓަނޭޝަނަލް އެއާޕޯޓް މެދުވެރިކޮށް ވައްދަން އުޅުނު އެއް ލައްކައަށް ވުރެ ގިނަ ސިނގިރޭޓުގެ މައްސަލަ ދާދި ފަހުންވަނީ ފެންމަތިވެފައެވެ.