އިންޑިއާއިން ވަނީ ޕާކިސްތާނަށް ރޭ ދިން ހަމަލާތަކަށް ރައްދު ދިނުމުގެ ގޮތުން އިންޑިއާގެ ފަސް ފައިޓާ ޖެޓާއި ގިނަ ޑްރޯން ވައްޓާލާފައިވާ ކަމަށް ޕާކިސްތާނުން  ބުނެފިއެވެ. 

ޕާކިސްތާނުގެ ދިފާޢީ ވަޒީރު ޚަވާޖާ އާސިފް މީޑިއާތަކަށް ޚަބަރު ދެއްވަމުން ވިދާޅުވި ގޮތުގައި، އިންޑިއާއިން ދިން ވައިގެ ހަމަލާތަކަށް ރައްދު ދިނުމުގެ ގޮތުން ޕާކިސްތާނުގެ ސިފައިން ވަނީ އިންޑިއާގެ ފަސް މަތިންދާބޯޓާއި ގިނަ ޑްރޯންތަކެއް ވައްޓާލާފައެވެ. މަޢުލޫމާތު ވަޒީރު ޢަޠާއުالله ތަރާރުވެސް މިކަން ކަށަވަރުކުރައްވައި، އެ މަތިންދާބޯޓުތައް ވައްޓާލާފައިވަނީ އެކި ސަރަޙައްދުތަކުގައި ކަމަށް ވިދާޅުވިއެވެ.

އަދި ޕާކިސްތާނުގެ ހަތިޔާރުއެޅި ބާރުތަކުން އިންޑިއާގެ ގިނަ މަރުކަޒުތަކަކަށް ހަމަލާދީ، ދުޝްމަނުގެ ބްރިގޭޑް ހެޑްކުއާޓަރސް ވަނީ ހަލާކުކޮށްލާފަކަމަށް ޕާކިސްތާނުގެ ނޫސްތަކުން މަޢުލޫމާތު ދެއެވެ.

އިންޑިއާއިން ބުނި ގޮތުގައި ރޭ އެ ޤައުމުން ދިން މިސައިލް ހަމަލާތައް އަމާޒުކޮށްފައިވަނީ ޕާކިސްތާނުގެ އާބާދީ ބޮޑު ޕަންޖާބު ސޫބާއާއި ޕާކިސްތާނުގެ ބެލުމުގެ ދަށުގައިވާ ކަޝްމީރުގެ ނުވަ ސަރަޙައްދެއްގައި ހުރި "ޓެރަރިސްޓް އިންފްރާސްޓްރަކްޗަރ" އަށެވެ.

ޕާކިސްތާނުން ބުނި ގޮތުގައި ބުދަ ދުވަހުގެ ހަމަލާތަކުގައި އަންހެނުންނާއި ތިން އަހަރުގެ ކުޑަކުއްޖަކު ހިމެނޭ ގޮތަށް އަށް މީހުން މަރުވެ، 35 މީހުންނަށް ޒަޚަމްވެފައިވެއެވެ.

މި ހަމަލާތައް ދީފައިވަނީ ހަ ސަރަޙައްދަކަށެވެ. ޕާކިސްތާނުގެ ބޮޑުވަޒީރު ޝަހްބާޒް ޝަރީފް މި ހަމަލާތައް ސިފަކުރެއްވީ "ހަނގުރާމައިގެ ޢަމަލެއް" ގެ ގޮތުގައެވެ.

މި ހަމަލާތައް ދީފައިވަނީ އިންޑިއާގެ ބެލުމުގެ ދަށުގައިވާ ކަޝްމީރުގައި ފަތުރުވެރިންނަށް ދިން މަރުގެ ހަމަލާއަށް ދެ ހަފުތާއަށްވުރެ ގިނަ ދުވަސް ފަހުންނެވެ. އެ މަރުގެ ހަމަލާގައި މަދުވެގެން 25 އިންޑިއާ ރައްޔިތުންނާއި އެއް ނޭޕާލް ރައްޔިތަކު މަރުވިކަމަށް އެ ޤައުމުގެ މީޑިއާތަކުން ހާމަކުރެއެވެ.

މިހާދިސާ ހިނގާފައިވަނީ ނިމިދިޔަ އޭޕްރީލް މަހުގެ 22 ވަނަ ދުވަހުއެވެ. އެ ހަމަލާގެ ޒިންމާ އިންޑިއާއިން އަޅުވާފައިވަނީ އެ ޤައުމުގެ އަވައްޓެރި ޕާކިސްތާނުގެ މައްޗަށެވެ. ނަމަވެސް ޕާކިސްތާނުން އެ ހަމަލާގައި ބައިވެރިވި ކަމަށް ދެކޮޅު ހަދާފައިވެއެވެ.