ދިވެހިރާއްޖޭގެ މަދަނީ ވައިގެ ދަތުރުފަތުރުގެ ޤާނޫނު އުވަލައި، ގިނަ އިސްލާޙުތަކަކާއެކު އަލުން މި ޤާނޫނު އެކުލަވާލަން ރައްޔިތުންގެ މަޖިލީހަށް ހުށައަޅައިފިއެވެ.

ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ހުޅުމާލެ މެދު ދާއިރާގެ މެންބަރު ޢަބްދުﷲ ޝަޒީމެވެ. މި ބިލުގެ ފުރަތަމަ ކިޔުން މިދިޔަ ހޯމަ ދުވަހު ވަނީ އިއްވާފައެވެ. އަދި ބިލުގެ ބަހުސް ތަޅުމުގައި މިއަދު ވަނީ ފަށާފައެވެ.

ރާއްޖޭގައި މިހާރު ބޭނުން ކުރެވެމުން އަންނަ މަދަނީ ވައިގެ ޤާނޫނު، ޤާނޫނު ނަންބަރ: 2/2001 (ދިވެހިރާއްޖޭގެ މަދަނީ ވައިގެ ދަތުރުފަތުރުގެ ޤާނޫނު) އަކީ މީގެ ސައުވީސް އަހަރު ކުރީގެ ޤާނޫނެކެވެ.

ބިލު ރައްޔިތުންގެ މަޖިލީހަށް ހުށައެޅުއްވި ސަބަބެއްކަމަށް ބަޔާންކޮށްފައިވަނީ، މިހާރު އަމަލުކުރަމުން  އަންނަ ދިވެހިރާއްޖޭގެ މަދަނީ ވައިގެ ދަތުރުފަތުރުގެ ޤާނޫނުގެ ބަދަލުގައި ޒަމާނާ އެކަށީގެންވާ ތަންފީޒީ ނިޒާމެއް މެދުވެރިކޮށް މަދަނީ ވައިގެ ދަތުރުފަތުރުގެ އެންމެހައި ކަންކަން ހިންގައި ތަންފީޒުކުރުމަށްޓަކައި ތަޢާރުފުކުރަންޖެހޭ ޤާނޫނީ އޮނިގަނޑު ތަޢާރަފުކުރުމެވެ.

އަދި ދިވެހިރާއްޖޭގެ މަދަނީ ވައިގެ ދަތުރުފަތުރުގެ ސަލާމަތްތެރިކަމާއި ރައްކާތެރިކަމާގުޅޭ އުޞޫލުތަކާއި މިންގަނޑުތައް ދިވެހިރާއްޖެ ބައިވެރިވެފައިވާ މަދަނީ ވައިގެ ދަތުރުފަތުރާބެހޭ ބައިނަލްއަޤުވާމީ މުޢާހަދާގައި ކަނޑައަޅާފައިވާ މިންގަނޑުތަކާއި އުޞޫލުތަކާ އެއްގޮތްވާ ގޮތުގެ މަތިން ކަނޑައެޅުމަށެވެ.

މީގެ އިތުރުން، މަދަނީ ދަތުރުފަތުރުގައި ހިނގާ އެކްސިޑެންޓްތަކާއި ޙާދިސާތައް ތާޙްޤީޤްކުރުމަށްޓަކައި ޤާއިމުކުރަންޖެހޭ ޤާނޫނީ އޮނިގަނޑު ތަޢާރަފްކުރުމާއި، މަދަނީ ވައިގެ ދަތުރު ފަތުރުގެ ސަލާމަތާއި ރައްކާތެރިކަމާގުޅޭ އެނޫންވެސް އުޞޫލުތައް ބަޔާންކުރުމެވެ.

ފާހަގަކޮށްލެވޭ ގޮތުގައި މި ޤާނޫނަށް އެތަކެއް ބޮޑެތި ބަދަލުތަކެއް ގެނެވިގެންދާއިރު، މަދަނީ ވައިގެ ދަތުރުފަތުރުގެ އެކްސިޑެންޓާއި ސީރިއަސް އިންސިޑެންޓްތައް ތަޙުޤީޤުކުރުމަށްޓަކައި "މޯލްޑިވްސް އެއަރ އެކްސިޑެންޓްސް އިންވެސްޓިގޭޝަން އެޖެންސީ"އެއް މިޤާނޫނަށް ޢަމަލުކުރަން ފެށުމާއެކު އުފެދުން ވެގެން ދިޔައީ ގިނަ ބައެއްގެ ސަމާލުކަން ލިބިގެން ދިޔަކަމަކަށެވެ.

އަދި ހަމަމިއާއެކު، މި ބިލު ފާސްވެ، ތަސްދީޤުކޮށް ޢަމަލުކުރަން ފަށާތާ 60 ދުވަހުގެ ތެރޭގައި "އެއަރޕޯޓް ޑިވެލޮޕްމެންޓް އޯވަރސައިޓް ކައުންސިލް"ގެ ނަމުގައި 5 މެންބަރުންގެ މައްޗަށް އެކުލެވޭ ކައުންސިލެއް މަދަނީ އުދުހުންތަކާ ބެހޭ ވަޒީރު އެކުލަވާލަންވާނެ ކަމަށާއި ވައިގެ ބަނދަރުތައް ތަރައްޤީކުރުމާގުޅޭ މާސްޓަރޕްލޭނެއް އެކުލަވާލާ، ކޮންމެ 5 އަހަރަކުން އެއްފަހަރު މުރާޖައާކުރުމަކީ މިކައުންސިލުގެ ޒިންމާއެއްކަމުގައި ބަޔާންކޮށްފައިވެއެވެ.