ޣައްޒާ ހިސޯރުކޮށް، އެހީތައް ކޮންޓްރޯލް ކުރުމުގެ ހުއްދަ އަސްކަރިއްޔާއަށް ދިނުމަށް އިސްރާއީލުގެ ސެކިއުރިޓީ ކެބިނެޓުން ފާސްކޮށްފިއެވެ. އެއާއެކު އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވަނީ ފަލަސްތީނުގައި ހިންގަމުންދާ ޤަތުލުޢާއްމު އިތުރަށް ވަރުގަދަވެގެންދާނެކަން އިއުލާން ކޮށްފައެވެ. 

އިސްރާއީލުގެ ޑިފެންސް އޮފިޝަލެއް ބުނެފައިވާ ގޮތުގައި މި އޮޕަރޭޝަން ފެށޭނީ އެމެރިކާގެ ރައީސް ޑޮނަލްޑް ޓްރަމްޕް މެދުއިރުމަތީގެ ދަތުރުފުޅު ނިންމާލުމުންނެވެ.

އިސްރާއީލުގެ ޕަބްލިކް ބްރޯޑްކާސްޓަރުން ރިޕޯޓުކުރި ގޮތުގައި މި އައު ރޭވުމަކީ މަހުން މަހަށް ކުރިއަށްދާނެ ރޭވުމެކެވެ. އަދި މި ރޭވުމުގެ ތެރެއިން ފުރަތަމަ އަމާޒުކުރާނީ ޣައްޒާގެ އެއް ސަރަހައްދަކަށެވެ.

މިކަމާއި ގުޅިގެން ޖައްބާރު ނެތަންޔާހޫ އާއްމު ކުރި ވިޑިއޯ މެސެޖެއްގައި ބުނެފައިވަނީ މި އޮޕަރޭޝަނުގައި ފަލަސްތީނުގެ ރައްޔިތުން "އެމީހުންގެ ރައްކާތެރިކަމަށްޓަކައި" ޣައްޒާއިން ނެރޭނެ ކަމަށެވެ. އަދި އިސްރާއީލުގެ ސިފައިން މިފަހަރު ހިފާ ސަރަހައްދުތައް ދޫނުކޮށް ހިފަހައްޓާނެ ކަމަށް ވެސް ބުންޏެވެ.

އިސްރާއީލުގެ ސިފައިން މިހާރު ވަނީ ޣައްޒާގެ ތިންބައިކުޅަ އެއްބައި ހިސޯރުކޮށްފައެވެ. އަދި އެ ސަރަހައްދުގެ އާބާދީ ނެރެ، ސެކިއުރިޓީ ޒޯންތަކެއްގެ ގޮތުގައި އެ ސަރަހައްދުތައް ބަދަލުކޮށްފައެވެ. އެހެންނަމަވެސް، މި އައު ރޭވުމުގެ ދަށުން މުޅި ޣައްޒާ ހިސޯރުކޮށް، އާބާދީ ދެކުނަށް ބަދަލުކޮށް، އިންސާނީ އެހީތައް ހަމާސްގެ އަތްމައްޗަށް ދޫނުވާނެ ގޮތަކަށް ކަންކަން ބައްޓަންކުރާނެ ކަމަށް އިސްރާއީލުގެ އޮފިޝަލުން ބުނެފައިވެއެވެ. 

އިސްރާއިލުން ސުންނާފަތި ކޮށްފައިވާ ޣައްޒާގެ ސަރަހަެއްދެއް: ފޮޓޯ/ އިންޓަނެޓް

އިސްރާއީލުން ހިންގަމުންދިޔަ ޤަތުލު ޢާއްމު މެދުކަނޑާލުމަށްފަހު، އަލުން މާރޗް މަހު އެކަން އަލުން ފެށީ، ޣައްޒާއަށް އެހީ ފޯރުކޮށްދޭނެ މަގުތައްވެސް ބަންދުކޮށްފައެވެ. މިކަމާ ގުޅިގެން އދ. އިން ވަނީ ޣައްޒާގެ 2.3 މިލިއަން އާބާދީ ބަނޑަށްޖެހުމުގެ ނުރައްކަލާ ކުރިމަތިލާން ޖެހިދާނެ ކަމަށް އިންޒާރު ދީފައެވެ.

އިސްރާއީލުގެ ޑިފެންސް އޮފިޝަލް ބުނެފައިވާ ގޮތުގައި ޣައްޒާގެ ވަށައިގެން ހިފާފައިވާ ސެކިއުރިޓީ ޒޯންތައް އެމީހުން ދުލެއް ނުކުރާނެއެވެ. އެއީ އިސްރާއީލުގެ އާބާދީތައް ރައްކާތެރިކުރުމަށް މުހިންމު ސަރަހައްދުތަކެއް ކަމަށް ވާތީއެވެ.

މިކަމާއި ގުޅިގެން ހަމާސްގެ އޮފިޝަލް މަހްމޫދު މަރްދަވީ ވިދާޅުވެފައިވަނީ މި "ބިރުދެއްކުމާއި މަޖުބޫރުކުރުން" ބަލައިނުގަންނާނެ ކަމަށެވެ. އަދި "ހަނގުރާމަ ހުއްޓުވައި، ޣައްޒާއިން އިސްރާއީލުގެ ސިފައިން އެއްކޮށް ނެރެ، ޣައްޒާ އަލުން އިމާރާތްކުރުމާއި، ދެފަރާތުގެ ހުރިހާ ގައިދީން ދޫކޮށްލުން" ހިމެނޭ އެއްބަސްވުމަކަށް މެނުވީ އެއްބަސްނުވާނެ ކަމަށް ވެސް ބުނެފައިވެއެވެ.

އިސްރާއީލްގެ ޤަތުލު ޢާއްމު ފެށުނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސްއިން އިސްރާއީލަށް ދިން ހަމަލާއާ ގުޅިގެންނެވެ. އެ ހަމަލާގައި އިސްރާއީލުގެ 1,200 އެއްހާ މީހުން މަރުވެ، 251 މީހުން ރަހީނުންގެ ގޮތުގައި ޣައްޒާއަށް ގެންދެވުނެވެ. އޭގެފަހުން އިސްރާއީލުން ޣައްޒާއަށް ދިން ހަމަލާތަކުގައި 52,000 އަށްވުރެ ގިނަ ފަލަސްތީނުގެ ރައްޔިތުން ޝަހީދުވެފައިވާ ކަމަށް ޣައްޒާގެ ސިއްހީ އިދާރާތަކުން ބުނެފައިވެއެވެ. އަދި ޣައްޒާގެ ގިނަ ސަރަހައްދުތައް ވަނީ ވީރާނާވެފައެވެ.