އިންޑިޔާގައި މިހާރު ކުރިއަށްދާ 19 އަހަރުން ދަށުގެ ސާފް ޗެންޕިއަންޝިޕް ފުޓްބޯޅަ މުބާރާތުގެ ގުރޫޕް އޭގައި މިއަދު ހަވީރު ބަންގްލަދޭޝް އިން ދެލަނޑުގެ ލީޑެއް ހޯދާފައި ވަނިކޮށް ފަހަތުން އަރައި ދިވެހި ޓީމުން ދެލަނޑު ކާމިޔާބުކޮށް ބަންގްލަދޭޝް މޮޅުވިޔަނުދީ ހިފަހައްޓައިފިއެވެ.

މެޗުގެ ފުރަތަމަ ހާފުގައި ބަންގްލަދޭޝް އިން ދެލަނޑުގެ ލީޑެއް ހޯދިއިރު، އެޓީމުގެ ފުރަތަމަ ލަނޑު ފުރަތަމަ ހާފުގެ 13 ވަނަ މިނެޓުގައި ކާމިޔާބުކޮށްދިނީ އެޓީމުގެ ނަޒުމުލް ހުދާ ފައިސަލް އެވެ. އަދި އެޓީމުން ލީޑު ފުޅާކުރި ލަނޑު ފުރަތަމަ ހާފުގެ 45 ވަނަ މިނެޓުގައި ކާމިޔާބުކޮށްދިނީ އެމްޑީ ރިފްއަތް ޖާޒީ އެވެ.

ރާއްޖެ އިން ނަތީޖާގެ ފަރަގު ކުޑަކުރި ލަނޑު ދެވަނަ ހާފުގެ 57 ވަނަ މިނެޓުގައި ކާމިޔާބުކޮށްދިނީ އަނޫފް އަބްދުﷲ އެވެ. އަދި ރާއްޖެ އިން ނަތީޖާ އެއްވަރުކުރި ލަނޑު ފަހުހާފުގެ 73 ވަނަ މިނެޓުގައި ކާމިޔާބުކޮށްދިނީ އީތަން އިބްރާހިމް ޒަކީ އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

Advertisement

8 މެއި 2025 އިން 18 މެއި 2025 ގެ ނިޔަލަށް ކުރިއަށްދާ މި މުބާރުގައި މިއަހަރު ޖުމްލަ ހަ ޓީމަކުން ވާދަކުރަމުން އަންނައިރު، މުބާރާތް ކުރިއަށްދަނީ ބައިވެރިވި ހަ ޓީމު ދެގުރޫޕަކަށް ބަހާލައިގެންނެވެ. އެގޮތުން ގުރޫޕް އޭގައި ރާއްޖެ އާއި ބަންގްލަދޭޝްގެ އިތުރުން ދެންހިމެނެނީ ބޫޓާން އެވެ. އަދި ގުރޫޕް ބީގައި މުބާރާތް ބާއްވާ ގައުމު އިންޑިޔާގެ އިތުރުން ދެންހިމެނެނީ ސްރީލަންކާ އަދި ނޭޕާލް އެވެ.

މުބާރާތުގެ ގުރޫްޕް ސްޓޭޖުފަހު މެޗުގައި މިމަހުގެ 13 ވަނަ ދުވަހު ހަވީރު ދިވެހި ޓީމު ނުކުންނާނީ ބޫޓާން އާއި ދެކޮޅަށެވެ.