ބައެއް ގޭބީސީތަކަށް މިދިޔަ މަހު ފޮނުވި ކަރަންޓް ބިލާއި ކުރީ މަހުގެ ކަރަންޓް ބިލްގައި އެއް އަދަދެއް ހިމެނުނު ސަބަބު ސްޓެލްކޯ އިން ސާފުކޮށްދީފި އެވެ.
އެ ކުންފުނިން އެކަން ސާފުކޮށްދީ އެޕްރީލް މަހުގެ ކަރަންޓު ބިލުތަކަށް ދީފައިވާ ޑިސްކައުންޓާއި ގުޅޭ މައުލޫމާތު ވަނީ ހާމަކޮށްފަ އެވެ.
ސްޓެލްކޯ އިން ބުނީ މިއަހަރުގެ މާރިޗު މަހުގެ (ރަމަޟާން މަހުގެ) ކަރަންޓުބިލަށް ޑިސްކައުންޓު ދީފައިވާ ފަދައިން އެޕްރީލް މަހުގެ ކަރަންޓު ބިލަށް ވެސް ވަނީ ޑިސްކައުންޓު ދީފައި ކަމަށެވެ.
މާރިޗު މަހުގެ (ރަމަޟާން މަހުގެ) ދުވަސްތައް ނިމުމަށްފަހު، އޭޕްރީލްމަހުގެ ބިލްތަކުންވެސް މިއަހަރު ޑިސްކައުންޓެއް ދީފައި ވަނީ، އޭޕްރީލް މަހަކީ ހޫނު ގަދަވުމުގެ ސަބަބުން އާއްމުކޮށް ކަރަންޓުބިލުތައް ވަރަށް ބޮޑުވާ މަހަކަށްވާތީ، ރައްޔިތުންނަށް އިތުރު ލުޔެއް އޭޕްރީލް މަހުވެސް ދިނުމަށް ވެސް ބުންޏެވެ.
އެހެން ކަމުން، އޭޕްރީލް މަހުގެ ކަރަންޓުބިލު އެ ކުންފުނީގެ ކަސްޓަމަރުންނަށް ފޯރުކޮށްދިންއިރު، އެ ބިލުގައިވާ "ކަރަންޓު ބޭނުންކުރެވުނު ވަރު" އޭގެ ކުރީ މަހާ ތަފާތުވި ނަމަވެސް، ބައެއް ބިލްތަކުގައި ބިލް އަމައުންޓު (ފައިސާގެ އަދަދު) މާރިޗު މަހުގެ (ރަމަޟާން މަހު) ބިލާއި ސީދާ އެއް އަދަދެއްގެ ގޮތުގައި އޮތީ އެ ލުއި ދިނުމުން ކަމުގައި ބުންޏެވެ.
ބައެއް މީހުން ވަނީ މާޗްމަހާ އޭޕްރީލް މަހުގެ ބިލްގައި އެއް އަދަދެއް ހިމަނާފައިވުމުން އެކަން ފާހަގަކޮށް ސޯޝަލް މީޑިއާގައި އެކި ޝުއޫރުތައް ފާޅުކޮށްފަ އެވެ.
Advertisement
This content is created and paid for by advertisers and does not involve Voice Journalists
