ޣައްޒާއަށް ކާބޯތަކެތި ފޯރުކޮށްދޭ މަގުތައް ނިރުބަވެރި އިސްރާއީލުން ބަންދުކުރުމުގެ ސަބަބުން 65،000 އަށްވުރެ ގިނަ ކުޑަކުދިން ބަނޑުހައިހޫނުކަމުގެ ނުރައްކަލާ ކުރިމަތިލާންޖެހިފައިވާ ކަމަށް ކަމާބެހޭ އިދާރާތަކުން ބުނެފިއެވެ.
ޣައްޒާގެ ކަމާބެހޭ އިދާރާތަކުން ބުނެފައިވަނީ އިސްރާއީލުން ވޭތުވެދިޔަ ދެމަސް ދުވަހުގެ ތެރޭގައި ކާބޯތަކެއްޗާއި، ތެލާއި، ބޭސްފަރުވާގެ ތަކެތި ހިމެނޭ 39،000 އަށްވުރެ ގިނަ އެހީގެ ޓްރަކު ވެއްދުން މަނާކޮށްފައިވާ ކަމަށެވެ. މިކަމަކީ 2.4 މިލިއަން އާންމު ރައްޔިތުންނާ ދެކޮޅަށް ކުރާ ބޮޑު ކުށެއް ކަމަށާ އަދި ބައިނަލްއަޤްވާމީ އިންސާނީ ޤާނޫނުތަކާ ޚިލާފު ޢަމަލެއް ކަމަށްވެސް ބުނެފައިވެއެވެ.
"ޣައްޒާގެ ހުރިހާ ބޭކަރީތަކެއް ވެސް ވިދިވިދިގެން 40 ދުވަހު ވަނީ ބަންދުކުރެވިފައި. މީގެ ސަބަބުން އާންމު ރައްޔިތުންނަށް ރޮށި/ޕާން ފަދަ ތަކެތި ލިބުމުގެ ފުރުސަތު ގެއްލިފައިވޭ،" ޣައްޒާގެ ކަމާބެހޭ އިދާރާތަކުން ބުނެފައިވެއެވެ.
"އިސްރާއީލުން އާންމު ރައްޔިތުންނާ ދެކޮޅަށް ބަނޑުހައިހޫނުކަން ހަތިޔާރެއްގެ ގޮތުގައި ބޭނުންކުރަމުންދާތީ، މިހާރު 65،000 އަށްވުރެ ގިނަ ކުޑަކުދިން ތިބީ ބަނޑުހައިހޫނުކަމުން މަރުވުމުގެ ނުރައްކަލާ ކުރިމަތިލާންޖެހިފައި."
ޣައްޒާގެ ކަމާ ބެހޭ އިދާރާތައް
މީގެ އިތުރުން، ޣާއްޒާއަށް އެހޫ ވައްދާ މަގުތައް ބަންދު ކޮށްފައިވާތާ 70 އަށްވުރެ ގިނަ ދުވަސް ވެފައިވާއިރު، އެކަމުގެ ސަބަބުން ޣައްޒާގެ އިންސާނީ އެހީ އަދި ޞިއްޙީ ޚިދުމަތްތަކުގެ ނިޒާމު ވަނީ މުޅިން ހަލާކުވެފައި ކަމަށް ސަރަޙައްދުގެ އިދާރާތަކުން ބުނެފައިވެއެވެ.
ޣައްޒާގެ ސަރުކާރުން ވަނީ ޣައްޒާގެ ބޯޑަރު ކްރޮސިންތައް އަލުން ހުޅުވައި، ރައްޔިތުންގެ ފުރާނަ ސަލާމަތްކުރުމަށް ބޭނުންވާ އިންސާނީ އެހީ ފޯރުކޮށްދިނުން ކަށަވަރުކުރުމަށް އދ އާއި ބައިނަލްއަޤްވާމީ މުޖުތަމަޢުއަށް ގޮވާލާފައެވެ.
އިސްރާއީލުން 2023 ވަނަ އަހަރުގެ އޮކްޓޯބަރު މަހު ޣައްޒާގައި ފެށި ޤަތުލުޢާއްމުގެ ސަބަބުން މިހާތަނަށް 52،800 އަށްވުރެ ގިނަ ފަލަސްޠީނު ރައްޔިތުން މަރުވެފައިވާ ކަމަށް ސަރަޙައްދުގެ ޞިއްޙީ އިދާރާތަކުން ބުނެފައިވެއެވެ. މީގެ ތެރެއިން ގިނައީ އަންހެނުންނާއި ކުޑަކުދިންނެވެ.
Advertisement
This content is created and paid for by advertisers and does not involve Voice Journalists
