އިއްޔެގެ ނިޔަލަށް ރާއްޖެއަށް 884,802 ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން މިއަދު އާއްމުކުރި ތަފާސްހިސާބުތަކަށް ބަލާއިރު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް ވަނީ، މިދިޔަ އަހަރުގެ މި މުއްދަތާ އަޅާބަލާއިރު 8.1 އިންސައްތަ އިތުރުވެފައެވެ. މިދިޔަ އަހަރުގެ މެއިމަހުގެ 10 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކޮށްފައިވަނީ،  818,341 ފަތުރުވެރިންނެވެ.

އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ، ޗައިނާ، ރަޝިއާ، އިނގިރޭސިވިލާތް، އިޓަލީ އަދި ޖަރުމަނުވިލާތުންނެވެ. ތަފާސްހިސާބަށް ބަލާއިރު އެންމެގިނައިން ފަތުރުވެރިން ޒިޔާރަތްކޮށްފައިވަނީ ރިސޯޓްތަކާއި ގެސްޓްހައުސްތަކަށެވެ.

Advertisement

- ރިސޯޓްތަކަށް: 626,920 ފަތުރުވެރިން

- ގެސްޓްހައުސްތަކަށް: 208,952 ފަތުރުވެރިން

- ހޮޓާތަކަށް: 26،219 ފަތުރުވެރިން

- ސަފާރީތަކަށް: 22،129 ފަތުރުވެރިން

އަހަރުގެ މިހާތަނަށް އާއިރު ރާއްޖޭގައި 175 ރިސޯޓް ހިންގަމުންދާއިރު، އެ ތަންތަނުގައި 43،313 އެނދުހުރިއިރު، މިހާރު އޮޕަރޭޓްކުރަމުންދާ 832 ގެސްޓްހައުސްގައި 14،260 އެނދު އެބަހުއްޓެވެ. އަދި 158 ސަފާރީ އޮޕަރޭޓްކުރަމުންދާއިރު، ސަފާރީތަކުގައި 3،187 އެނދު އެބަހުއްޓެވެ.

މިދިޔަ އަހަރު ރާއްޖެއަށް 2 މިލިއަން ފަތުރުވެރިން އައިސްފައިވާއިރު، ޓޫރިޒަމް މިނިސްޓްރީގެ އަމާޒަކީ މިއަހަރު ނިމުމުގެ ކުރިން އެއަދަދު 2.2 މިލިއަނަށް އިތުރުކުރުމެވެ.