ޕާކިސްތާނުގެ ޤައުމީ އެއާލައިން، ޕާކިސްތާން އިންޓަރނޭޝަނަލް އެއާލައިނުން ޔޫރަޕްގެ އިތުރު މަންޒިލްތަކަށް ދަތުރުތައް ފެށުމަށް ތައްޔާރުވެއްޖެއެވެ.

ޤާނޫނު ހަދާމަޖިލީހުގައި ވާހަކަދައްކަވަމުން ޕާލިމެންޓް ސެކެރެޓަރީ ޒެބް ޒައްފާރު ވިދާޅުވީ ޕީއައިއޭއަށް މާލީގޮތުން ދިމާވި ދަތިތަކުން އަރިގަނެ، ފްރާންސްގެ އިތުރުން ޔޫރަޕްގެ ޤައުމުތަކަށް ދަތުރު ފެށުމަށް ތައްޔާރުވަމުންދާކަމަށެވެ. އެގޮތުން އީޔޫގެ އޭވިއޭޝަން ސޭފްޓީ އޭޖެންސީން އެ އެއާލައިނަށް ހުއްދަ ދޭނޭކަމުގެ ޔަގީންކަން ދީފައިވާކަމަށް ވިދާޅުވިއެވެ.

ޒެބް ވަނީ ޤާނޫނު ހަދާ މަޖިލީހުގެ ތެރޭގައި ބައެއް މެމްބަރުން ޕާކިސްތާނު އެއާލައިނާ ގުޅޭގޮތުން ދައްކާފައިވާ ނޭދެވޭ ވާހަކަތަކުގެ ސަބަބުން އެ އެއާލައިނަށް ގޮންޖެހުންތަކެއް ލިބިފައިވާކަން ފާހަގަކުރައްވާފައެވެ. ޕީއައިއޭއަށް ވަނީ، 20 އަހަރަށްފަހު ފުރަތަމަ ފަހަރަށް މިދިޔަ އަހަރު ފައިދާވެފައެވެ. ޕީއައިއޭއަށް މިދިޔަ އަހަރު 33.14 މިލިއަން ޑޮލަރުގެ ފައިދާއެއް ލިބިފައެވެ. ޒެބް ވިދާޅުވީ، މިއީ ޕާކިސްތާނުގެ ޤައުމީ އެއާލައިނުގެ ދަތުރުތައް ފުޅާކުރަން އެންމެ އެކަށޭނެ ވަގުތުކަމަށެވެ. 

ޕާކިސްތާނުގެ ވެރިރަށް ކަރާޗީއަށް 2020 ވަނަ އަހަރު ވަނީ ޕީއައިއޭގެ ބޯޓެއް ވެއްޓި އެތައްބަޔަކު މަރުވެފައެވެ. މި ހާދިސާއާ ގުޅިގެން އީޔޫއިން ވަނީ ޕާކިސްތާން އިންޓަރނޭޝަނަލް އެއާލައިނަށް ޔޫރަޕަށް އުދުހުން މަނާކޮށްފައެވެ. އީޔޫގެ ފްލައިޓް ސޭފްޓީ އޭޖެންސީން އޭރު ބުނެފައިވަނީ ޕީއައިއޭގެ ބޯޓުތަކުގެ ސަލާމަތާމެދު ސުވާލު އުފެދޭކަމަށެވެ. 

ވޭތުވެދިޔަ އަހަރުތަކުގައި ޕީއައިއޭއިން ވަނީ އެ އެއާލައިނުގެ ރައްކާތެރިކަން ކަށަވަރުކުރުމަށް ވަރަށްބޮޑަށް މަސައްކަތްކޮށްފައެވެ. ނަތީޖާއެއްގެ ގޮތުން މިދިޔަ ދުވަސްތަކުގައި ބައެއް މަންޒިލްތަކަށް ދަތުރުތައް ފެށިއިރު، ޕީއައިއޭއިން ދަނީ އެފްރިކާ އަދި މެދުއިރުމަތީގެ ބައެއް ސަރަހައްދުތަކަަށްވެސް އުދުހުންތައް ފެށުމަށް ތައްޔާރުވަމުންނެވެ.