އޭޕްރީލް މަހު ހެންވޭރު ގެއެއްގެ ފުރާޅު މައްޗަށް ހައްވާ ޔުމްނު ކިޔާ އަންހެނަކު  ވެއްޓުނު މައްސަލައިގެ ތަހުގީގަށް ނުފޫޒު ފޯރުވަން ޖެހޭ ވަރުގެ އެއްވެސް މީހަކަށް ތަހުގީގީ އިދާރާތަކުން ތުހުމަތުކޮށްފައި ނުވާ ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެއެވެ.

ޔުމްނު ވެއްޓުނު މައްސަލައާ ގުޅިގެން އިދިކޮޅު އެމްޑީޕީން ރައްޔިތުންގެ މަޖިލީހަށް ހުށަހަޅުއްވާފައިވާ އަމީންގެ އިތުބާރު ނެތް ކަމުގެ މައްސަލައިގައި މަޖިލީހަށް ހާޒިރުވެވަޑައިގެން ވާހަކަ ދައްކަވަމުން ވިދާޅުވީ، އެ މައްސަލާގައި އޭނާގެ ތިމާގެ މީހަކަށް ތުހުމަތު ކުރެވޭ ކަމަށް މިހާތަނަށް ތަހުގީގީ އިދާރާތަކުން ހާމަކޮށްފައި ނުވާ ކަމަށެވެ. 

އަމީން ވިދާޅުވީ، މއ. މާންދޫގެ ދެކުނު އަކީ އޭނާ އެކަނި ދިރިއުޅޭ ގެ ނޫން ކަމަށެވެ. އަދި އެތަނަކީ އޭނާގެ އިތުރުން އިތުރު ތިން މީހެއްގެ ނަން މަތީގައިވާ ތަނެއް ކަމަށާ އެހެންކަމުން އެ އިމާރާތުގައި ކުރެވޭ ކުށެއްގެ ޒިންމާ އޭނާ ވަކި މަގާމެއްގައި ހުރުމުން ނަގަންޖެހޭ ކަަމަށް ދެކުމަކީ ބުއްދި ގަބޫލު ކުރެވޭ ކަމެއް ނޫން ކަމަށް އަމީން ވިދާޅުވުއެވެ. 

މިއާއެކު އަމީން ވިދާޅުވީ، އެ ހާދިސާއާ ގުޅިގެން ބައެއް ކަންކަން އަމީން ސިއްރުކުރައްވާފައިވާ ކަމަށް މައްސަލައިގައި ބުނެފައިވާއިރު، ކަމެއް ސިއްރުކޮށްފައި ވާކަމަށް ވިދާޅުވާ ނަމަ، އެކަމެއް އަދި ސިއްރުކުރަން ކުރި ކަމެއް ސާފުކޮށްދެއްވަންވާނެ ކަމަށް ގަބޫލު ކުރައްވާކަމަށެވެ. 

މީގެ އިތުރުން، ޔުމްނު ވެއްޓުނު ހާދިސާއާއި ގުޅުވައި އަމީންގެ ތިމާގެ ނުވަތަ ޢާއިލީ މަޞްލަޙަތު ހިމެނޭ ފަރާތެއް ބައިވެރިވާ ކަމުގެ ތުހުމަތު ވެސް އެއްވެސް އިދާރާއަކުން ކޮށްފައި ނެތީސް އެފަދަ އިދާރާއަކުން ކުރާ ތަޙުޤީޤަކަށް ނުފޫޒު ފޯރުވަންޖެހޭ ސަބަބެއް ނެތް ކަމަށްވެސް އަމީން ވަނީ ވިދާޅުވެފައެވެ.

"ބަހުސްގެ ބޭނުމަށް ބެލި ނަމަވެސް ނެތް. ބަހުސްގެ ބޭނުމަށް އެ ހާދިސާއަށް އަޅުގަނޑުގެ ތިމާގެ ނުވަތަ ޢާއިލީ މަޞްލަޙަތު އޮތް ފަރާތަކާ ގުޅުވި ނަމަވެސް، އެއީ ބޮޑެތި މީހުން. އަމިއްލަ ކަންކަމަށް އަމިއްލައަށް ޒިންމާ ނަގަންޖެހޭ ފަރާތްތައް. އަޅުގަނޑުގެ ދަރިންނެއް ނޫން އަޅުގަނޑުގެ އަތްބެއް ނޫން. އަޅުގަނޑުގެ މައިންބަފައިންނެއް ނޫން. އަދި އަޅުގަނޑު ބަލަހައްޓާ ފަރާތެއް ވެސް ނޫން"، އަމީން ވިދާޅުވިއެވެ.

ހަމަ އެހެންމެ، ޔުމްނު ވެއްޓުނު މައްސަލައިގައި ކުރީގެ ފުލުސް ކޮމިޝަނަރު އަލީ ޝުޖާއަށް އަމީން ގުޅުއްވި ކަމަށާ، ކޮމިޝަނަރަށް ގުޅުއްވީ އޭނާ ދިރިއުޅުއްވާ ގެކޮޅަށް ފުލުހުން އަންނަން ކޯޓު އަމުރެއް ބޭނުންނުވާނެ ވާހަކަ ދަންނަވަން ކަމަށް އަމީން ވިދާޅުވިއެވެ. ނަމަވެސް ޝުޖާޢު ފޯނު ނުނެންގެވި ކަމަށް އަމީން ވިދާޅުވިއެވެ. 

އަމީން ވިދާޅުވި ގޮތުގައި މި މައްސަލައާ ގުޅިގެން އޭނާއަށް ކުރަނީ އެއްވެސް އަސާސެއް ނެތް ތުހުމަތުތަކެކެވެ.