މިދިޔަ މަހު ކަޝްމީރުގެ ޕަހަލްގަމްއަށް ޓެރަރިސްޓުން ދިން ހަމަލާގެ ރައްދުގައި ޕާކިސްތާނުގައި ހުރި އަމާޒުތަކަކަށް އިންޑިއާއިން ރައްދު ހަމަލާދިން އޮޕަރޭޝަން ސިންދޫރަކީ ޕާކިސްތާނުގައި އޮތް ޓެރަރިޒަމްގެ ބަލިމަޑުކަމަށް ދިން ބޭހެއްކަމަށް އިންޑިއާގެ ދިފާޢީ ވަޒީރު ވިދާޅުވެއްޖެއެވެ.

ރަޖްނާތު ސިންހް މިހެން ވިދާޅުވީ މިއަދު ޖައްމު އަދި ކަޝްމީރުގެ ސަލާމަތީ ކަންކަން ބައްލަވާލެއްވުމަށް އެސަރަހައްދަށް ވަޑައިގެން، ސިފައިންނާ ވާހަކަ ދައްކަވަމުންނެވެ. ކަޝްމީރަށް ވަޑައިގެން ރަޖްނާތު ވަނީ ޕާކިސްތާނުން ހަމަލާދިން ބައެއް ސަރަހައްދުތަކަށް ވަޑައިގެންފައެވެ. އަދި ހަމަލާދިނުމަށް ބޭނުންކުރި ބައެއް ޝެލްތައްވެސް ބައްލަވާލެއްވިއެވެ.

ސިފައިންނާއި ވާހަކަ ދައްކަވަމުން ރަޖްނާތު ސިންހް ވަނީ އިންޑިއާ ސިފައިން ދައްކަމުންދާ ހިތްވަރަށް ޝުކުރު އަދާކުރައްވާފައެވެ. އޭނާ ވިދާޅުވީ ދިފާޢީ ވަޒީރަށްވުމުގެ އިތުރުން އޭނާއަކީވެސް އިންޑިއާ ރައްޔިތެއްކަމަށާއި، އެތަނަށް ވަޑައިގަތީ ވަޒީރުގެ ހައިސިއްޔަތުންނާއި އިންޑިއާގެ ރައްޔިތެއްގެ ހައިސިއްޔަތުން ސިފައިންނަށް ޝުކުރު އަދާކުރެއްވުކަމަށް ކަމަށެވެ. ޕަހަލްގަމްގައި ޕާކިސްތާނަށް ނިސްބަތްވާ ޓެރަރިސްޓުން ދިން ހަމަލާގައި ގިނަ އަދަދެއްގެ ބަޔަކު މަރުވުމާއި ގުޅިގެން އެކަމުގެ ބަދަލިހިފުމުގެ ގޮތުން އިންޑިއާއިން ދިން ހަމަލާއަކީ ޓެރަރިސްޓުންގެ ހަނދާނުން ފޮހެނުލެވޭނެ ހަމަލާއެއްކަމަށް ރަޖްނާތު ސިންހް ވިދާޅުވިއެވެ. އަދި އޭނާ އެހަމަލާތައް ސިފަކުރެއްވީ ޕާކިސްތާނުގައި ފެތުރިފައި އޮތް ޓެރަރިސްޓް ބައްޔަށް ދެވުނު ބޭހެއްގެ ގޮތުގައެވެ.