އިސްރާއީލްގެ ނިރުބަވެރިން ޣައްޒާގައި ހިންގަމުންދާ ޤަތުލުޢާއްމު ވަގުތުން ހުއްޓާލައި، ކާބޯތަކެއްޗާއި އިންސާނީއެހީ ވެއްދޭނެ ދޮރުތައް ހުޅުވާލުމަށް ޢަރަބި ލީގުން ގޮވާލައިފިއެވެ.
ބަޣްދާދުގައި ބޭއްވުނު 34 ވަނަ ޢަރަބި ލީގު ސަމިޓަށްފަހު ނެރުނު ބަޔާނުގައި ވަނީ، ބައިނަލްއަޤްވާމީ މުޖުތަމަޢުއަށް، ޚާއްޞަކޮށް ނުފޫޒު ގަދަ ޤައުމުތަކުގެ ޤާނޫނީ ޒިންމާ އަދާކޮށް، ލޭއޮހޮރުވުން ހުއްޓުވުމަށް ބާރުއަޅައި، ޣައްޒާގެ ހުރިހާ ސަރަޙައްދަކަށް އެއްވެސް ހުރަހެއްނެތި އިންސާނީ އެހީ ފޯރުކޮށްދިނުމަށް މަސައްކަތްކުރުމަށް ގޮވާލާފައެވެ.
މިއާއެކު، ޢަރަބި ލީޑަރުން ވަނީ އިސްރާއީލުން ސީރިއާގެ ސަރަޙައްދުތަކަށް ދެމުންގެންދާ ޙަމަލާތަކާއި، އެ ޤައުމުގެ ސިޔާދަތަށް އަރައިގަތުމާއި، އެ ޤައުމުގެ ޤައުމީ ޤާބިލިއްޔަތު ނައްތާލުމަށް ކުރަމުންދާ މަސައްކަތްތައް ހުއްޓާލުމަށް ގޮވާލާފައެވެ.
”އަޅުގަނޑުމެން ބައިނަލްއަޤްވާމީ މުޖުތަމަޢުއަށާއި އދ. ގެ ސަލާމަތީ މަޖިލީހަށް ގޮވާލަނީ މި ޙަމަލާތައް ހުއްޓުވުމަށް ބާރުއަޅައި، ޤައުމުތަކުގެ ސިޔާދަތަށް އިޙްތިރާމްކުރުމަށް." ޢަރަބި ލީގުގެ ބަޔާނުގައިވެއެވެ.
ބަޣްދާދުގައި ބޭއްވުނު މި އަރަބި ލީގުގެ ސަމިޓަކީ، ޢިރާޤުން ހޯސްޓްކުރި ހަތަރުވަނަ ސަމިޓެވެ. މި ސަމިޓުގައި 22 ޢަރަބި ޤައުމުތަކުގެ ލީޑަރުން ބައިވެރިވެ، ސަރަޙައްދީ މުހިންމު މައްސަލަތަކާ މެދު މަޝްވަރާކުރިއެވެ.
ޣައްޒާގައި ހިނގަމުންދާ ޤަތުލުޢާއްމަކީ މި ސަމިޓުގެ މައިގަނޑު އެއް މައުޟޫއެވެ. އޭގެ އިތުރުން ޔަމަން، ސޫދާން، ސީރިއާ އަދި ލީބިއާގެ ހަނގުރާމަތަކާއި، އީރާނާއި އެމެރިކާ ދެމެދު ހިނގަމުންދާ ނިއުކްލިއަރ މުޢާހަދާގެ މަޝްވަރާތަކާ ބެހޭގޮތުންވެސް މަޝްވަރާކުރެވުނެވެ.
މި ސަމިޓުގައި އދ. ގެ ސެކްރެޓަރީ ޖެނެރަލް އަންޓޯނިއޯ ގުޓެރެސް ބައިވެރިވިއެވެ. އަދި އިސްރާއީލުގެ ޙަމަލާތައް ގަދައަޅައި ކުށްވެރިކުރައްވާފައިވާ ސްޕެއިންގެ ބޮޑުވަޒީރު ޕެޑްރޯ ސަންޗެޒް މެހުމާނެއްގެ ގޮތުގައި ވާހަކަފުޅު ދެއްކިއެވެ.
Advertisement
This content is created and paid for by advertisers and does not involve Voice Journalists
