މުރައިދޫ އިންވިޓޭޝަނަލް ވެޓަރެންސް ވޮލީބޯޅަ ޓޯނަމެންޓް 2025 ގެ އޮފިޝަލް ކިޓްސް ޕާޓްނަރަކަށް ޖާޒިއާ ހަމަޖައްސައިފި އެވެ.

މުބާރާތުގެ ކިޓްސް ޕާޓްނަރާއެކު ވޮއިސް އޮފީހުގައި ބޭއްވި ސޮއިކުރުމުގެ ރަސްމިއްޔާތުގައި ޖާޒިއާގެ ފަރާތުން ސޮއިކުރީ ކޯ-ފައުންޑާ ހަސަން ދިލްޝާން އެވެ. އަދި ނިޔާ އެކަޑަމީގެ ފަރާތުން މިއެއްބަސްވުމުގައި ސޮއިކުރީ އެކަޑަމީގެ ޖެނަރަލް ސެކެޓްރީ އައިޝަތު ޝާއިނާ އެވެ.

މި މުބާރާތަކީ ހއ.މުރައިދޫގެ "ނިޔާ އެކަޑަމީ"ގެ ފަރާތުން އިންތިޒާމުކޮށް ތިލަދުންމަތީގެ ރަށްތަކުގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން ކުރީގެ ހުނަރުވެރި ވޮލީބޯޅަ ކުޅުންތެރިންނަށް، ވާދަވެރި އަދި އެކުވެރި މާހައުލެއްގައި އެކުޅުންތެރިންގެ ހުނަރު ދައްކާލުމުގެ ފުރުސަތު ތަނަވަސް ކޮށްދިނުމުގެ އިތުރުން ދުޅަހެޔޮ މުޖުތަމައެއް ބިނާކުރުމުގެ މަގުސަދުގައި އެ އެކަޑަމީގެ ފަރާތުން 35 އަހަރުން މަތީގެ މީހުނަށް ޚާއްސަކޮށްގެން ބާއްވާ މުބާރާތެކެވެ.

އެގޮތުން މިމުބާރާތުގައި މުރައިދޫގެ އިތުރުން ތިލަދުންމަތީގެ އިތުރު ނުވަ ރަށަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 10 ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

2019 ވަަނަ އަހަރު ފެށިގެން ރާއްޖޭގައި ކުޅިވަރު ސާމާނު ސަޕްލައިކުރަމުން އަންނަ ޖާޒިޔާއަކީ ދިވެހި އަމިއްލަ ބްރޭންޑެއްގެ ގޮތުގައި މި ޚިދުމަތް ފޯރުކޮށްދޭން ފެށި ފުރަތަމަ ފަރާތެވެ. އަދި ޖާޒިޔާގެ ޚިދުމަތައް ހަ އަހަރުވެފައިވާއިރު، އަމިއްލަ ބްރޭންޑެއްގެ ގޮތުގައި ޖާޒިޔާ އިން ވަނީ ބޮޑެތި ކުރިއެރުންތަކެއް ހޯދާފައެވެ. އެގޮތުން ރާއްޖޭގެ ފުޓްސަލް ކޮމިއުނިޓީއަށް ޚާއްސަކޮށްގެން "ޕާމްއޭރޯ"ގެ ނަމުގައި ފުޓްސަލް ބޯޅައެއް ޑިޒައިންކޮށް، ޖާޒިޔާއިން ވަނީ މާކެޓައް ނެރެފައެވެ.

ޖާޒިއާއަކީ ރާއްޖޭގައި ކުޅިވަރު ސާމާނު ސަޕްލައިކުރަމުން އަންނަ އެންމެ ފެންވަރު ރަނގަޅު ދިވެހި ބްރޭންޑަށްވުމުގެ އިތުރުން ޖާޒިއާގެ ޖާޒީ ޑިޒައިންތައް ތަފާތުވެފައި ކޮލިޓީ ވެސް ރަނގަޅެވެ. އަދި ޤައުމީ ޓީމުތަކުގެ ޖާޒީތަކާއި ރާއްޖޭގެ އެކި ސަރަހައްދުތަކުގައި ބާއްވާ އެކިއެކި ކުޅިވަރު މުބާރާތްތަކަށް ޚާއްސަކޮށްގެން ފަރުމާކުރާ އަމިއްލަވަންތަ ޑިޒައިންތަކާއެކު ޖާޒިއާގެ ޚިދުމަތް މުޅި ރާއްޖެއަށް ވަނީ ފުޅާވެފައެވެ.

މީގެ އިތުރުން ޚިދުމަތުގެ ކޮލެޓީއާއެކު އަތްފޯރާފަށުގައި ކުޅިވަރު ސާމާނު ފޯރުކޮއްދިނުމުގައި ކުރު މުއްދަތެއްގެ ތެރޭގައި ޖާޒިއާ އިން ވަނީ ދިވެހި ކުޅިވަރު ކޮމިއުނިޓީގެ އިތުބާރު ހޯދާފައެވެ.