ހައްދުފަހަނައަޅާފައިވާ އިސްރާއިލުން ޣައްޒާގައި ހިންގަމުންދާ ޢުދުވާނުތަކުގައި އިއްޔެ އެކަނިވެސް 150 އަށްވުރެ ގިނަ މީހުން ޝަހީދު ކޮށްލައިފިއެވެ. 

އިސްރާއީލުން ޣައްޒާގައި ހިންގަމުންދާ ޤަތުލުޢާއްމު މިފަހުން އަންނަނީ ދުވަހަކަަށްވުރެ ދުވަހެއް ވަރުގަދަ ކުރަމުންނެވެ. އެގޮތުން ހުކުރު ދުވަހުން ފެށިގެން ކޮންމެ ދުވަހަކު 100 އަށްވުރެ ގިނަ މީހުން ޝަހީދުކުރަމުންދާއިރު، އިއްޔެ ވަނީ 151 މީހުން ޝަހީދު ކޮށްލާފައެވެ. 

އަލް ޖަޒީރާއިން ރިޕޯޓްކޯސްފައިވާ ގޮތުގައި އިސްރާއީލުގެ ސިފައިން ޣައްޒާގެ ޚާން ޔޫނިސްގައި ހުރި ނާސިރު ހޮސްޕިޓަލަށް ވެސް އިއްޔެ ވަނީ ބޮމުގެ ޙަމަލާއެއް ދީފައެވެ. މި ޙަމަލާގައި މަދުވެގެން 6 މީހުން ވަނީ ޝަހީދުވެފައެވެ. 

ޣައްޒާގެ ސިއްޙީ ވުޒާރާއިން ބުނާ ގޮތުގައި މިހާތަނަށް ޝަހީދުވެފައިވާ މީހުންގެ އަދަދު 53،339 އަށް އަރާފައިވާއިރު، 121،034 މީހުން ޒަޚަމްވެފައިވެއެވެ. ނަމަވެސް ސަރުކާރުގެ މީޑިއާ އޮފީހުން ޝަހީދުވި މީހުންގެ އަދަދު 61،700 އަށް އަޕްޑޭޓްކޮށްފައިވެއެވެ.

އިސްރާއީލުން ޣައްޒާއަށް ހަމަލާތައް ދެމުން ގެންދަނީ، އިންސާނީ އެހީ އާއި ކާބޯތަކެތި ވެއްދޭނެ މަގުތައްވެސް ބަންދު ކޮށްގެންނެވެ. އޭގެ ސަބަބުން ޣައްޒާގެ ރައްޔިތުން ބަނޑަށްޖެހިފައުވާއިރު، އިސްރާއިލުން މިހާރު ވަނީ ޣައްޒާއަށް ”ފުދޭ މިންވަރެއްގެ އެހީ“ ވައްދަން ހުއްދަ ދޭނެ ކަމަށް ބުނެފައެވެ. ނަމަވެސް މި އެހީ ވައްދާނެ ވަގުތެއް އަދި ސާފެއް ނުކޮށްދެއެވެ.