ހަނގުރާމައިގެ ސަބަބުން އިންސާނީ ބޮޑު ކާރިސާއެއް ކުރިމަތިވެފައި އޮތް ޢައްޒާއަށް އެހީގެ ޓްރަކްތައް ވެއްދުމުގެ ހުއްދަ ލިބިފައިވާކަމަށް އދ އިން ބުނެފިއެވެ.

ޖެނީވާގައި މީޑިއާތަކާ ވާހަކަދައްކަވަމުން އދ ގެ ހިއުމެނިޓޭރިއަން އޮފީހުގެ ތަރުޖަމާނު ޖެންސް ލާކޭ ވިދާޅުވީ، ޢައްޒާއަށް އެހީގެ ޓްރަކްތައް ވެއްދުމުގެ ހުއްދަ އިސްރާއީލުން ދީފައިވާކަމަށެވެ. އަދި މިހާތަނަށް ހުއްދަ ލިބިފައިވަނީ 100 ޓްރަކަށް ޢައްޒާއަށް އެތެރެވެވޭގޮތަށެވެ. އެގޮތުން އިއްޔެ އެކަނިވެސް 9 ޓްރަކް ވެއްދުނުކަމަށް އޭނާ ފާހަގަކުރެއްވިއެވެ. 

އެ ޓްރަކްތަކުގައި ހިމެނެނީ ކުޑަކުދިންނަށް ބޭނުންވާ ސާމާނުކަމަށާއި އޭގެ ތެރޭގައި ކާބޯތަކެތި ހިމެނޭކަން ޖެންސް ވިދާޅުވިއެވެ. އެހީގެ ބައެއް ޓްރަކްތައް ޢައްޒާއަށް ވެއްދުނު ނަމަވެސް އެހީގެ ތަކެތި ބެހުމުގައި ގޮންޖެހުންތަކެއް ހުރިކަން އޮފިޝަލް ވަނީ ފާހަގަކުރައްވާފައެވެ. މީގެ ތެރޭގައި އެންމެ ބޮޑު އެއް މައްސަލައަކީ ރައްކާތެރިކަން ކަށަވަރުނުވުންކަމަށްވެސް އޭނާ ފާހަގަކުރެއްވިއެވެ.

އިސްރާއީލުން ޢައްޒާއަށް މެދު ނުކެނޑި ދެމުންގެންދިޔަ ހަމަލާތަކުގެ ސަބަބުން ޢައްޒާގެ ރައްޔިތުން ވަނީ ބަނޑަށްޖެހި އިންސާނީ ކާރިސާއެއް ކުރިމަތިވެފައެވެ. މީގެ ކުރިން އެތައް ފަހަރަކު އެހީގެ ތަކެތި ވެއްދުމަށް މަސައްކަތްކުރިނަމަވެސް އިސްރާއީލް ސިފައިން އެކަމަށް ހުަރަސްއެޅުމާއެކު މިހާތަނަށްވެސް އެކަން އޮތީ އަދި ނުކުރެވިއެވެ. މިކަމާ ގުޅިގެން ބައިނަލްއަޤްވާމީ އެކި ފަރާތްތަކުގެ ކަންބޮޑުވުން ފާޅުކުރިނަމަވެސް އިސްރާއީލުން އެފަރާތްތަކުގެ އަޑު އަހާފައެއް ނުވެއެވެ.