ދައުލަތުގެ މާލިއްޔަތާ ހިލާފަށް 2023 ވަނަ އަހަރު ބަޖެޓުން ބޭރުން 2 ބިލިއަނަށްވުރެ ގިނަ ރުފިޔާ ހޭދަކޮށްފައިވާކަމަށް އޮޑިޓް ރިޕޯޓުން ހާމަވެއްޖެއެވެ.

އޮޑިޓަރ ޖެނެރަލް ހުސައިން ނިޔާޒީ ސޮއިކުރައްވައި ނެރުއްވާފައިވާ ދައުލަތުގެ 2023 ވަނަ އަހަރުގެ މާލީ މުއާމަލާތްތަކުގެ އޮޑިޓް ރިޕޯތްގައި ބުނެފައިވަނީ، އެއަހަރު ހަރަދުކުރުމަށް 49.3 ބިލިއަން ރުފިޔާގެ ބަޖެޓެއް ފާސްކުރިނަމަވެސް، ދައުލަތުގެ މާލިއްޔަތު ގާނޫނާ ހިލާފަށް އެތައް ހަރަދެއް ކޮށްފައިވާކަން އެނގެން އޮންނަ ކަމަށެވެ. މަޖިލީހުން ބަޖެޓެއް ފާސްކުރިނަމަވެސް އުސޫލްތަކާ ހިލާފަށް އެއަހަރުގެ ތެރޭގައި 2.1 ބިލިއަން ރުފިޔާ އިތުރަށް ހަރަދުކޮށްފައިވާކަން އޮޑިޓް ރިޕޯޓްގައި ވަނީ ފާހަގަކޮށްފައެވެ.

މީގެ ތެރެއިން ގިނަ އަދަދެއްގެ ފައިސާއަކީ އެކިއެކި މަޝްރޫޢުތައް ހިންގުމަށް ހަވާލުކުރި ކޮންޓްރެކްޓްރުންނަށް ދީފައިހުރި ފައިސާއެވެ. މިއީ ޤާނޫނު އަސާސީއާއި ދައުލަތުގެ މާލިއްޔަތާ މުޅިން ހިލާފަށް ކޮށްފައިވާ ހޭދައެއްކަމަށް ރިޕޯޓްގައި ވަނީ ބަޔާންކޮށްފައެވެެ.

އޮޑިޓަރ ޖެނެރަލްގެ ރިޕޯޓްގައި ވަނީ އެއަހަރުގެ ތެރޭގައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށްވެސް ހަރަދުކުރަން ހުއްދަ ދިންވަރަށްވުރެ އިތުރަށް ހޭދަކޮށްފައިވާކަން ފާހަގަކޮށްފައެވެ. ޕީއެސްއައިޕީގެ މަޝްރޫޢުތަކަށް 2023 ވަނަ އަހަރު ފާސްކޮށްފައިވަނީ، 10.3 ބިލިއަން ރުފިޔާއެވެ. ނަމަވެސް މާލިއްޔަތު ޤާނޫނާ ޤަވާއިދުތަކާ ހިލާފަށް ހުއްދަ ނުހޯދައި 1.6 ބިލިއަން ރުފިޔާ ހޭދަކޮށްފައިވާކަން ވަނީ ފާހަގަކޮށްފައެވެ. 

މީގެ އިތުރުން ސަރުކާރު ކުންފުނިތަކުގެ ފައިދާގެ ގޮތުގައި ދައުލަތުގެ ބައިތުލްމާލަށް ލިބެންޖެހޭ ފައިސާ އާއި ކުއްޔާއި، ޖޫރިމަނާ އަދި އިންޓްރަސްޓް ފައިސާގެ ގޮތުގައި މާލީ ވުޒާރާއަށް ލިބޭނޭކަމަށް ބުނެފައިވާ އަދަދުތަކުގައި ފުށުއެރުންތަކެއް ހުރިކަން ވަނީ އޮޑިޓް ރިޕޯޓްގައި ފާހަގަކޮށްފައެވެ.

އޮޑިޓަރ ޖެނެރަލްގެ ރިޕޯޓުގެ އުސްއަލިތަކަށް ބަލާއިރު 2023 ވަނަ އަހަރު ނިމުނުއިރު ބޭރުގެ އެކި ފަރާތްތަކަށް ދައްކަންޖެހޭ އަދަދު 25.1 ބިލިއަނަށްވުރެ ގިނަ ރުފިޔާ، ބޭރުފައިސާއިން ބަލާނަމަ، 1.6 ބިލިއަން ޑޮލަރަށް އަރައެވެ. 2022 ވަނަ އަހަރު ނިމުނުއިރު މި އަދަދު ހުރީ 29.9 ބިލިއަން ރުފިޔާ ނުވަތަ 1.9 ބިލިއަން ޑޮލަރުގައެވެ. އޮޑިޓް ރިޕޯޓްގައިވާ ހިސާބުތަކަށް ބަލާއިރު 2023 ވަނަ އަހަރު ބޭރުގެ އެކި ފަރާތްތަކަށް ދަރަނި އަދާކުރުމަށް 318.8 މިލިއަން ޑޮލަރު ވަނީ ހޭދަކޮށްފައެވެ.