މިދިޔަ އަހަރު ބޭންކް އޮފް މޯލްޑިވްސްއަށް ލިބުނު ފައިދާއިން ހިއްސާގެ ފައިދާގެ ގޮތުގައި ހިއްސާަކަށް 55 ރުފިޔާ ބަހަން ނިންމައިފި އެވެ.

ގައުމީ ބެންކުން މި ނިންމުން ނިންމީ މިރޭ އޮތް އެ ކުންފުނީގެ މިދިޔަ އަހަރުގެ އާންމު ޖަލްސާގަ އެވެ. އެ ޖަލްސާގައި ހިއްސާދާރުންގެ އަޣުލަބިއްޔަތުން ނިންމީ ހިއްސާއަކަށް 55 ރުފިޔާގެ މަގުން 296 މިލިއަން ރުފިޔާ ބެހުމަށެވެ.

މިއީ ބެންކުގެ ތާރީޚުގައި ހިއްސާދާރުންނަށް ބެހުމަށް ނިންމި އެންމެ ބޮޑު އަދަދެވެ.

ބީއެމްްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވި ގޮތުގައި ކުންފުނީގެ ފައިދާ އިތުރުވެ ހިއްސާދާރުންނަށް ރެކޯޑް އަދަދެެއްގެ ފައިސާ ބެހުމަށް ނިންމުމަކީ ކުންފުނީގެ ހިންގުން ހަރުދަނާ ކަމުގެ ހެއްކެއް ކަމަށެވެ.

އަދި އެއީ ބީއެމްއެލްގެ މުވައްޒިފުންނާއި ހިންގުންތެރީންގެ ބުރަ މަސައްކަތުގެ ނަތީޖާ ކަމަށް ވިދާޅުވެ މުވައްޒިފުންގެ އަގުވަޒަން ކުރެއްވި އެވެ. ޝަރީފް ޔަގީންކަން ދެއްވީ ބެންކުގެ ހިދުމަތް އިތުރަށް ފުޅާކޮށް ފުރިހަމަ ކުރަައްވާނެ ކަމެވެ.

މިއަހަރުގެ ފުރަތަމަ ކުއާޓަރުގައި ބޭންކް އޮފް މޯލްޑިވްސްއަށް ސާފްފައިދާގެ ގޮތުގައި 497 މިލިއަން ރުފިޔާ ވަނީ ލިބިފަ އެވެ.

ޤައުމީ ބޭންކުގެ ފުރަތަމަ ކުއާޓަރުގެ މާލީބަޔާނުގައި ވާގޮތުން މި ކުއާޓަރުގައި އެ ބޭންކަށް އާމްދަނީގެ ގޮތުގައި ވަނީ، 1.3 ބިލިއަން ރުފިޔާ ލިބިފައެވެ. އިންޓަރެސްޓްގެ ގޮތުގައި މި ކުއާޓަރުގައި ބީއެމްއެލްއަށް 752.2 މިލިއަން ރުފިޔާ ލިބިފައިވާއިރު، ފީ އާއި ކޮމިޝަނުގެ ގޮތުގައި 508.2 މިލިއަން ރުފިޔާ ވަނީ ލިބިފައެވެ. 

މި ކުއާޓަރުގައި ހިންގުމުގެ ފައިދާގެ ގޮތުގައި 698 މިލިއަން ރުފިޔާ ލިބިފައިވާއިރު، ޕްރޮވިޝަންއަށް ވަނީ، 17.1 މިލިއަން ރުފިޔާ އަދި އިންކަމް ޓެކްސްއަށް ވަނީ 183.8 މިލިއަން ރުފިޔާ ކަނޑާފައެވެ.

ވޭތުވެދިޔަ ކުއާޓަރގައި ބީއެމްއެލް އިން އަމިއްލަ ފަރުދުންނާއި ވިޔަފާރިތަކަށް އަލަށް 1.7 ބިލިއަން ރުފިޔާގެ ލޯނު ދޫކޮށްފައިވާއިރު މިއީ މިދިޔަ އަހަރުގެ މި މުއްދަތާ އަޅާބަލާއިރު 72 އިންސައްތައިގެ ކުރިއެރުމެކެވެ. މި ކުއާޓަރގައި ބޭންކުން ލޯނު ދޫކޮށްފައިވާ އަދަދުވަނީ 470 މިލިއަނަށް ވުރެ އިތުރުވެފައެވެ. ކެޕިޓަލް އަދި ލިކުއިޑިޓީ ރޭޝިއޯ ވަނީ ގާނޫނު ލާޒިމްކުރާ މިންވަރަށްވުރެ މަތީގައި ދެމެހެއްޓިފައިވާކަމަށްވެސް ބީއެމްއެލުން ބުނެއެވެ.

މުޅި ރާއްޖެ ހިމެނޭ ބޭންކިން ވިއުގަޔަކާއެކު ބީއެމްއެލުން މިހާރު ވަނީ، 20 އަތޮޅެއްގައި 39 ބަރާންޗް 107 ސެލްފް ސާވިސް ބޭންކިން ސެންޓާ، އަދި 165 އޭޓީއެމް ގާއިމްކޮށްފަ އެވެ.