ޙައްޖުގެ ޤަވާޢިދުތަކާ ޚިލާފުވެ، ހުއްދަނެތި ހައްޖުގެ އަޅުކަން އަދާކުރުމަށް ސައުދީއަށް މީހުން ވައްދަން މަސައްކަތް ކުރި 6 މީހަކަށް ހަރުކަށި އަދަބު ދީފިއެވެ.
ސައުދީ އެރޭބިއާގެ އިންޓީރިއަރ މިނިސްޓްރީން ހާމަކުރި ގޮތުގައި، މައްކާއަށް ވަންނަ ތަންތަނުން ހައްޖު ސެކިއުރިޓީންގެ ގޮތުގައި މަސައްކަތް ކުރި ސައުދީއަށް ނިސްބަތްވާ 6 މީހަކު ވަނީ ހުއްދަނެތި ހައްޖަށް އައި 20 މީހުން މައްކާއަށް އެތެރެކުރުމަށް މަސައްކަތް ކޮށްފައެވެ. ނަމަވެސް، އެމީހުން ވެއްދުމުގެ ކުރިން، އެކަން ހުއްޓުވައި، މި 6 މީހުން ހައްޔަރު ކޮށްފައިވާ ކަމަށް ބުނެފައިވެއެވެ.
ސައުދީ ނޫސްތަކުން ރިޕޯޓް ކޮށްފައިވާގޮތުން، މި 6 މީހުންނަށް ޖަލު އަދަބާއި، 100،000 ސައުދީ ރިޔާލަށް ވުރެ ބޮޑުނޫން އަދަދަކުން ޖޫރިމަނާކުރުމާއި، އެމީހުންގެ ނަންތައް ނޫސްތަކުގައި ޝާއިޢުކުރުން ހިމެނެއެވެ.
އަދި ހުއްދަނެތި މައްކާއަށް ވަންނަން މަސައްކަތް ކުރި 20 މީހުން ޑީޕޯޓްކޮށް، 10 އަހަރަށް ސައުދީ އަށް އައުން މަނާކޮށްފައިވެއެވެ.
މީގެ އިތުރުން، ހުއްދަނެތި ހައްޖުވެރިން އުފުލުމަށް ބޭނުންކުރި އުޅަނދުތައް އަތުލުމަށާއި، ހުއްދަނެތި ހައްޖަށް ދިއުމަށް މަސައްކަތްކުރި މީހުން 20،000 ސައުދީ ރިޔާލަށްވުރެ ބޮޑުނޫން އަދަދަކުން ޖޫރިމަނާކުރުމަށް މިނިސްޓްރީން އެދިފައިވާ ކަމަށް ރިޕޯޓްކޮށްފައިވެއެވެ.
ހައްޖުވެރިންގެ ރައްކާތެރިކަމާއި ސަލާމަތްތެރިކަން ކަށަވަރުކުރުމަށްޓަކައި ހައްޖާ ގުޅޭ ޤަވާޢިދުތަކާއި އިރުޝާދުތަކަށް ތަބާވުމަށް އެންމެހާ ރައްޔިތުންނާއި ބިދޭސީންނަށް މިނިސްޓްރީން ވަނީ ގޮވާލާފައިވެއެވެ.
Advertisement
This content is created and paid for by advertisers and does not involve Voice Journalists
