ޣައްޒާގެ އުތުރުގައި މިހާރު ހުރި ހަމައެކަނި ހޮސްޕިޓަލް ކަމަށްވާ އަލް-އައުދާ ހޮސްޕިޓަލް ބަންދުކުރުމަށް އިސްރާއީލުން އަމުރުކޮށްފިއެވެ.

މި ހޮސްޕިޓަލް ބަންދުކުރުމާ ގުޅިގެން މިހާރު އެތަނުގައި ތިބި 97 މީހުން، އެހެން ތަނަކަށް ބަދަލުކުރުމަށް ދަނީ މަސައްކަތްކުރަމުންނެވެ. އޭގެ ތެރޭގައި ނާޒުކު ޙާލަތުގައި ތިބި 13 ބަލިމީހުން ހިމެނެއެވެ.

ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން ބުނާ ގޮތުގައި މި ހޮސްޕިޓަލުގެ މެޑިކަލް އިކުއިޕްމަންޓްތައް އެހެން ތަނަކަށް ބަދަލުކުރުމަކީ މަގުތައް ބަންދުވެފައި ވުމުގެ ސަބަބުން ކުރެވޭނެ ކަމެއް ނޫނެވެ. އަދި މި ހޮސްޕިޓަލް ބަންދުވުމާއެކު ޣައްޒާގެ އުތުރުގައި އޮޕަރޭޓްކުރާ އެއްވެސް ހޮސްޕިޓަލެއް ނުހުންނާނެ ކަމަށް ޑަބްލިއުއެޗްއޯ އިން ވަނީ ފާހަގަކޮށްފައެވެ.

ބުރާސްފަތި ދުވަހުގެ ފަތިހުން ފެށިގެން އިސްރާއީލުގެ ހަމަލާތަކުގައި މަދުވެގެން 70 ފަލަސްތީނު ރައްޔިތުން ވަނީ ޝަހީދުވެފައެވެ. އަދި ޣައްޒާގެ އުތުރާއި އިރުމަތީގައި ދިރިއުޅޭ ގިނަ އަދަދެއްގެ މީހުން އެތަން ދޫކޮށް އެހެން ތަނަކަށް ދިޔުމަށް އިސްރާއީލުން ވަނީ އަމުރުކޮށްފައެވެ.

ޣައްޒާގެ ހެލްތު މިނިސްޓްރީން ވަނީ ބައިނަލްއަޤްވާމީ ޤާނޫނުތަކުން ކަށަވަރުކޮށްދޭ ގޮތަށް ޣައްޒާގެ ސިއްހީ ނިޒާމު ރައްކާތެރިކޮށްދިނުމަށް ކަމާބެހޭ ފަރާތްތަކަށް ގޮވާލާފައެވެ. ޑަބްލިއުއެޗްއޯ އިން ވެސް ވަނީ ހޮސްޕިޓަލާއި އޭގެ މުވައްޒަފުންނާއި ބަލިމީހުންގެ ސަލާމަތާއި ރައްކާތެރިކަމަށް އެދި ގޮވާލާފައެވެ.

އިސްރާއިލުން ހިންގަމުންދާ ޤަތުލުޢާއްމު ފެށުނީއްސުރެ އެމީހުން ވަނީ ޣައްޒާގެ އެކި ސަރަހައްދުތަކުގައި ހުރި ހޮސްޕިޓަލްތަކަށް ހަމަލާދީ، ބޮންއަޅައި، މަގުތައް ބަންދު ކޮށްފައެވެ. މިކަމުގެ ސަބަބުން 1،400 އަށްވުރެ ގިނަ ސިއްހީ މަސައްކަތްތެރިންނާއި ބަލިމީހުންނާއި ހިމާޔަތަށް އެދިގެން އެތަންތަނުގައި ތިބި މީހުން ވަނީ ޝަހީދުވެފައެވެ.