މި އަހަރު ހައްޖުގެ އަޅުކަމަށް ވަޑައިގަންނަވަނީ ސައުދީ ރަސްގެފާނުގެ ހާއްސަ މެހެމާންދާރީގައި އެ ގައުމުގެ ހަރަދުގައި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ "ރައްޔިތުންނާއެކު" ނަމުގައި ގެނެސްދޭ ޕޮޑްކާސްޓް ގައި ވާހަކަ ދައްކަވަމުންނެވެ. ރައީސުލްޖުމްހޫރިއްޔާގެ އޮފީހުން ގެނެސްދޭ މި ޕޮޑްކާސްޓްގެ ހަތްވަނަ އެޕިސޯޑްގައި މިއަދު ވާހަކަ ދައްކަވަމުން ރައީސް ވަނީ އެމަނިކުފާނު މި އަހަރު, ހައްޖުގެ އަޅުކަމަށް ވަޑައިގަންނަވަނީ ދިވެހި ރައްޔިތުންނަށް ސައުދީން ދީފައިވާ ކޯޓާގެ ތެރެއިން ކަމަށް ބުނެ ދެކެވޭ ވާހަކަތަކާއި ގުޅޭގޮތުން ވާހަކަ ދައްކަވާފަ އެވެ.
އެ ވާހަކަތައް ރައީސް ސިފަ ކުރެއްވީ ވަރަށް ދެރަ ކަމެއްގެ ގޮތުގަ އެވެ. ވިދާޅުވީ އެއީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ. ރައީސް ވިދާޅުވީ މި އަހަރު ހައްޖުގެ އަޅުކަމަށް ވަޑައިގަންނަވަނީ ސައުދީ ރަސްގެފާނުގެ ހާއްސަ މެހެމާނެއްގެ ގޮތުގައި އެމަނިކުފާނުގެ ދައުވަތަކަށް ކަމަށެވެ. އަދި އެ ދަތުރުފުޅުގެ ހުރިހާ ހަރަދެއް ހަމަޖައްސަނީ ވެސް ސައުދީން ކަމަށް ވިދާޅުވި އެވެ.
ރައީސް ވިދާޅުވީ ކުރީގެ ވެރީންނަށް ވެސް ސައުދީ ސަރުކާރުން އެ ފުރުސަތު ފަހިކޮށްދީފައިވާ ކަމަށެވެ.
"އަޅުގަނޑަށް ވަރަށް ހާއްސަ ގޮތަކަށް މި ކަންކަން ހަމަޖައްސައިދެވިފައި މިއޮތީ. ވަކިން ފްލައިޓެއް ވެސް އެރޭންޖު ކޮށްދީފައި، ހަމަޖައްސައިދީ ފައި. އެއީ ވެސް ސަރުކާރުން އެއްވެސް ހަރަދެއް ކުރަން ޖެހޭ ކަމެއް ނޫން. ސަރުކާރުން ޗާޓާއެއް ވެސް ނުކުރޭ، ހިލޭ ރޯޔަލް ކޯޓުން ހަމަޖައްސައިދީފައި," ރައީސް ވިދާޅުވި އެވެ.
ރައީސް ވަނީ އެފަދަ ދޮގު ވާހަކަތައް ފެތުރުން ހުއްޓާލުމަށް އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
