ހަ އަހަރުގެ ދަރިފުޅަށް ޖިންސީ ގޯނާކުރިކަން ސާބިތުވެ، ކުއްޖާގެ ބައްޕަގެ މައްޗަށް އިއްވި 15 އަހަރުގެ ޖަލު ހުކުމެއް ބާތިލުކޮށް، އެ މައްސަލަ ދަށު ކޯޓުން އަލުން ބަލަން ހައިކޯޓުން ހުކުމްކޮށްފިއެވެ.
މި މައްސަލައިގައި ތުހުމަތު ކުރެވެނީ މުހައްމަދު ނިޔާޒް ކިޔާ މީހަކަށެވެ. މިއީ ކުޑަކުދިންނާ ގުޅޭ މައްސަލަ އަކަށްވުމުން ފިރިހެންމީހާގެ ރަށާއި އެހެނިހެން މައުލޫމާތު ވަނީ މައްސަލަ ނިންމި ރިޕޯޓްގައި ސިއްރު ކޮށްފައެވެ.
ނިޔާޒްގެ މައްޗަށް އުފުލާފައިވަނީ އިތުބާރު ކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލު ހިންގުމުގެ ކުށުގެ ދައުވާއެވެ. އެކަން ސާބިތުވެ އިއްވި 15 އަހަރުގެ ހުކުމް އޭނާގެ ފަރާތުން ވަނީ ހައިކޯޓުގައި އިސްތިއުނާފް ކޮށްފައެވެ.
މައްސަލަ އިސްތިއުނާފް ކުރީ އެކަށިގެންވާ މިންވަރަށް ހެކި ނެތީސް ހުކުމް ކުރުމުން ކަމަށް އޭނާގެ ފަރާތުން ބުނެފައިވެއެވެ.
އެ މައްސަލާގައި ބުނެފައިވާގޮތުން، ނިޔާޒް ވަނީ ކުއްޖާގެ ގެއަށް ގޮސް، އެ ގޭގެ ފާހާނާ ތެރޭގައި ކުއްޖާގެ ކުރިމަތިފަރާތާއި މޭމަތީގައި އަތްލާފައެވެ.
ދިފާއުގައި އޭނާ ބުނެފައިވަނީ، ކުއްޖާ ގަޔަށް އަތްލާފައިވަނީ ކުއްޖާ ފާހާނާ ކުރުމަށް ފަހު އެ ކުއްޖާ ދޮއްވުމަށް ކަމަށެވެ. އަދި އެކަން، ކުއްޖާގެ ގައިގައި އަތްނުލާ ނުކުރެވޭނެ ކަމަށާ، ކުއްޖާއަށް އަނިޔާއެެއް ވެފައި ނުވާކަން ކުއްޖާ ބެލި ޑޮކްޓަރުގެ ރިޕޯޓުން އެނގޭނެ ކަން އޭނާ ފާހަގަކޮށްފައިވެއެވެ.
އަދި މައްސަލާގައި ދަށު ކޯޓުން ކުއްޖާގެ ބަޔާނެއްވެސް ނަގާފައި ނުވާއިރު ކުއްޖާގެ މަންމަގެ ބަޔާނުން އެނގޭގޮތުން، މަންމައަށް ކުއްޖާ ކިޔައިދިން ކިޔައިދިނުމަކީ، މަންމަ ކޮށްފައިވާ ނޭދެވޭ ސުވާލުތަކުގެ ސަބަބުން ކުއްޖާ ބުނި ވާހަކަ ތަކެއް ކަމަށް ބެލެވޭ ކަމަށް ނިޔާޒް ބުނެފައުވެއެވެ.
ހަމަ އެހެންމެ، މަންމަ ބަޔާން ދީފައިވަނީވެސް ކުއްޖާގެ ބައްޕަދެކެ ނުރުހުންވެ ހުރެކަން އެނގޭއިރު މަންމަގެ ހެކި ބަހާމެދު ސުވާލު އުފެދޭ ކަމަށްވެސް ބުނެފައިވެއެވެ.
މީގެ އިތުރުން ކުއްޖާގެ ސައިކޮލޮޖިކަލް އެސެސްމެންޓް ހެދި ފަރާތް ފަރާތް ހާޒިރުނުކޮށް ޝަރީއަތުން ގޮތް ނިންމާފައުވާ ކަމަށާަ، ނިޔާޒްގެ މައްޗަށް އުފުލި ދައުވާގައި ހާދިސާ ހިނގި ތާރީޚާއި ވަގުތު ވެސް އެނގެން ނެތް ކަމަށް އޭނާގެ ފަރާތުން ބުނެފައިވެއެވެ.
އެ ވާހަކަތަކަށް ރައްދު ދެމުން ދައުލަތުން ބުނީ، އަތްލިކަމަށް ކުއްޖާ ބުނެފައިވުމުން އެއީ ކުއްޖާ ދޮއްވުމުގެ ތެރޭގައި ހިނގި ކަމެއް ނޫންކަން އެނގޭ ކަމަށެވެ. އަދި، ކުއްޖާގެ މަންމަގެ ބަހުން ވެސް ހަ އަހަރުގެ ކުއްޖަކު އެ ފަދަ ވާހަކަތަކެއް ހަދަހަދައިގެން ނުދައްކާނެކަން އެނގޭ ކަމަށް ދައުލަތުން ހައިކޯޓުގައި ބުނެފައިވެއެވެ.
އެ ވާހަކަތައް އަޑުއެހުމަށް ފަހު ހައިކޯޓުގައި މި މައްސަލަ ބެއްލެވި ފަނޑިޔާރުން ކަމަށްވާ، ފަނޑިޔާރު މުހައްމަދު ނިޔާޒާއި ފަނޑިޔާރު ހުސައިން މަޒީދު އަދި ފަނޑިޔާރު މުހައްމަދު ސަލީމެލު ވަނީ ދަށު ކޯޓުގެ ހުކުމް ބާތިލުކޮށް، އެ މައްސަލަ އެ ކޯޓުން އަލުން ބަލަން ތަހުވީލުކޮށްފައެވެ.
Advertisement
This content is created and paid for by advertisers and does not involve Voice Journalists
