މިއަހަރުގެ ޙައްޖު މޫސުމުގައި އާދަޔާ ޚިލާފަށް ހޫނުގަދަވެދާނެ ކަމަށް އިންޒާރު ސައުދީ އަރަބިއްޔާގެ ނޭޝަނަލް ސެންޓަރ އޮފް މެޓިއޮރޮލޮޖީ (އެންސީއެމް) އިން ދީފިއެވެ. އެ މަރުކަޒުން ބުނާ ގޮތުގައި މިއަހަރުގެ ޙައްޖު މޫސުމުގައި ހޫނުމިން 47 ޑިގްރީ ސެލްސިއަސްއަށް އަރައިފާނެއެވެ.

އެންސީއެމްގެ ސީއީއޯ ޑރ. އައިމަން ޣުލާމް ވިދާޅުވި ގޮތުގައި ދުވާލުގެ ވަގުތުތަކުގައި ފިނިހޫނުމިން 40 އާއި 47 ޑިގްރީ ސެލްސިއަސްއާ ދެމެދުގައި ހުންނާނެ ކަމަށް ލަފާކުރެވޭ އިރު، ރޭގަނޑުގެ ވަގުތުތަކުގައި 27 އާއި 32 ޑިގްރީ ސެލްސިއަސްއާ ދެމެދުގައި ހުންނާނެ ކަމަށް ލަފާކުރެވެއެވެ. އަދި ވައިގެ ތެތްކަން 15 އާއި 60 އިންސައްތައާ ދެމެދުގައި ހުންނާނެ ކަމަށް ވެސް ވަނީ ލަފާކޮށްފައިވެއެވެ.

މީގެ އިތުރުން، އުތުރާއި އުތުރު-ހުޅަނގު މިސްރާބުން ގަޑިއަކަށް 25 އާއި 35 ކިލޯމީޓަރުގެ ބާރުމިނުގައި ވައި ޖެހޭނެ ކަމަށް ލަފާކުރެވޭ ކަމަށާއި، މިކަމުގެ ސަބަބުން ވައިގެ ތެރޭގައި ހިރަފުސް ދައުރުވާ މިންވަރު އިތުރުވެ، ޚާއްސަކޮށް ހުސްބިންތައް އޮންނަ ސަރަހައްދުތަކާއި މާތް މުޤައްދަސް ބިންތަކަށް ދިއުމަށް ދަތުރުކުރާ ހައިވޭތަކުގައި ފުސްކަން އިތުރުވުން އެކަށީގެންވާ ކަމަށް ވިދާޅުވެފައިވެއެވެ.

އަދި ޒުލްޙިއްޖާ މަހުގެ 8 ވަނަ ދުވަހުން 13 ވަނަ ދުވަހާ ހަމައަށް މަޤާމުލް މުޤައްދަސާގެ ސަރަޙައްދުތަކަށް ވިއްސާރަ ކުރުމުގެ ފުރުސަތު އޮތް ކަމަށާއި، މިކަމުގެ ސަބަބުން ހިރަފުސްކަން އިތުރުވެ، ޙައްޖާޖީންނަށް އޮންނަ ނުރައްކާ އިތުރުވުން އެކަށީގެންވާ ކަމަށްވެސް އޭނާ ވިދާޅުވިއެވެ.

މި ޙާލަތާ ގުޅިގެން، ޙާޖީން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަށާއި، ގިނަ ގިނައިން ފެން ބުއިމަށް ސަމާލުކަން ދިނުމަށާއި، މޫސުމާ ގުޅޭ ރަސްމީ އަޕްޑޭޓްތަކަށް ސަމާލުވުމަށް ވަނީ އިލްތިމާސް ކޮށްފައެވެ.

ސައުދީގެ މޫސުމާ ބެހޭ އިދާރާއިން މިފަދައިން އިންޒާރުދޭއިރު، ޙާޖީންގެ ރައްކާތެރިކަމަށް ސައުދީ އަރަބިއްޔާއިން އަންނަނީ ގިނަ މަސައްކަތްތަކެއް ކުރަމުންނެއެވެ. މިގޮތުން، "ކޫލްޑް ރޯޑްސް އިނީޝިއޭޓިވް" ގެ ދަށުން މައްކާގައި ފިނިކުރެވިފައިވާ މަގެއް ވަނީ ހުޅުވާލާފައެވެ. މި މަޝްރޫޢުގެ މަ މަޤްޞަދަކީ ހޫނުކަން ކުޑަކޮށް، މަގުތަކުގެ ފިނިހޫނުމިން ދަށްކޮށް، ޙާޖީންނަށް ފަސޭހަކަމާއެކު ދަތުރުކުރެވޭނެ މާޙައުލެއް ޤާއިމުކުރުމެވެ.