އިޓަލީގެ އޭސީ މިލާނުގެ ޑިފެންޑަރު ތިއޯ ހެނާންޑޭޒް ހޯދުމަށް ސައުދީ ޕްރޮފެޝަނަލް ލީގުގެ އަލް ހިލާލުން އޭސީ މިލާނާއި އެކު އެއްބަސްވުމަކަށް އައިސްފައިވާކަމަށް އިޓަލީ މީޑިއަތަކުން ބުނެފިއެވެ.
މީޑިއާ ރިޕޯޓްތައް ބުނާގޮތުގައި އޭސީ މިލާނުން އެކުލަބުގެ ފްރާންސް ޑިފެންޑަރު ހެނާންޑޭޒް އަލް ހިލާލަށް ވިއްކާލުމަށް އެއްބަސްވެފައި ވަނީ 35 މިލިއަން ޔޫރޯގެ އަގަކަށެވެ. މިއީ އޭސީ މިލާނުން 2019 ވަނަ އަހަރު ރެއާލް މެޑްރިޑުން ގަތް އަގަށްވުރެ 12 މިލިއަން ޔޫރޯ އިތުރު އަގެކެވެ.
އުމުރުން 27 އަހަރުގެ ޑިފެންޑަރު ވަނީ ފާއިތުވެދިޔަ ހަ އަހަރު ތެރޭގައި އޭސީ މިލާނުގައި މޮޅު ކުޅުމެއް ދެއްކުމުގެ އިތުރުން 2021/22 ވަަނަ ސީޒަނުގެ ލީގު ޗެންޕިއަންކަން އެޓީމަށް ހޯދައިދިނުމުގައި މުހިންމު ދައުރެއް އަދާކޮށްދީފައެވެ.
މީގެ އިތުރުން އަލް ހިލާލުން ހެނާންޑޭޒަށް އަހަރު 15 މިލިއަން ޔޫރޯގެ މުސާރައެއް ހުށަހަޅާފައިވާއިރު، ކުޅުންތެރިއާގެ ފަރާތުން މިއަދަދު 20 މިލިއަން ޔޫރޯއަށް ބޮޑުކުރުމަށް ހުށަހަޅާފައިވާކަމަށް ވެސް އިޓަލީގެ މީޑިއާތަކުން ވަނީ ރިޕޯޓްކޮއްފައެވެ.
މީގެ އިތުރުން ކުރިއަށް އޮތް ކުލަބު ވޯލްޑްކަޕަށް ޓީމު އިތުރަށް ވަރުގަދަކުރުމަށް އަލް ހިލާލުން، އެޓީމުގެ ވާދަވެރި އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ، އެއް މަސްދުވަހުގެ ލޯނު އެއްބަސްވުމެއްގެ ދަށުން ހޯދުމަށް ވެސް ވަނީ މަސައްކަތް ކޮށްފައެވެ.
Advertisement
This content is created and paid for by advertisers and does not involve Voice Journalists
