ސިންގަޕޫރުގެ ގައުމީ ޓީމާއެކު އެގައުމުގައި ބައިނަލްއަގުވާމީ އެކުވެރިކަމުގެ މެޗެއް ކުޅުމަށާއި އޭއެފްސީ އޭޝިއަން ކަޕް ކޮލިފައިންގައި ޓިމޯ ލެސްޓޭއާ ދެކޮޅަށް ކުޅޭ މެޗު ކުޅުމަށް، ގައުމީ ފުޓުބޯޅަ ޓީމު ފުރައިފިއެވެ.

ސިންގަޕޫރުގައި ކުޅޭ އެކުވެރިކަމުގެ މެޗު ކުޅުމަށް ތާވަލުކޮށްފައި ވަނީ މިހަފްތާގެ ބުރާސްފަތި ދުވަހުއެވެ. އަދި އެގައުމުގައި ފަސް ދުވަސް  ތަމްރީނު ހެދުމަށްފަހު ޓިމޯ ލެސްޓޭއާ ދެކޮޅަށް ކުޅެން ހަމަޖެހިފައިވާ އޭއެފްސީ އޭޝިއަން ކަޕް ކޮލިފައިން މެޗަށް ގައުމީ ޓީމު ދަތުރުކުރާނީ އޮސްޓްރޭލިއާ އަށެވެ.

މި މެޗު ކުޅުމަށް ތާވަލުކޮށްފައިވަނީ ޖޫން 10 ގައެވެ. މިއީ ރާއްޖޭގެ ފުޓުބޯޅަ ތާރީޚުގައި އޮސްޓްރޭލިއާގައި ކުޅޭ ފުރަތަމަ މެޗެވެ. މެޗު ކުޅެނީ އޮސްޓްރޭލިއާގައި ޓިމޯ ލެސްޓޭގެ ގިނަ ބަޔަކު ދިރިއުޅޭ ސަރަހައްދެއްކަށްވާ ޑާވިންގައި ހުންނަ ޓެރިޓަރީ ރަގްބީ ލީގު ސްޓޭޑިއަމްގައެވެ. މިއީ 10،000 މީހުންގެ ޖާގައިގެ ސްޓޭޑިއަމެކެވެ. ނަމަވެސް މިއީ ރަސްމީ ފުޓުބޯޅަ މެޗުތައް ކުޅުމަށް އެހާ ގިނައިން ބޭނުންކުރާ ސްޓޭޑިއަމެއް ނޫނެވެ.

ރާއްޖެއާއި ޓިމޯ ލެސްޓޭ މެޗަކީ އަވޭ މެޗެކެވެ. އެހެން ނަމަވެސް ޓިމޯ ލެސްޓޭގައި ފީފާގެ މިންގަނޑުތަކަށް ފެތޭ ސްޓޭޑިއަމެއް މިވަގުތު ނެތެވެ. އެ ގައުމުގައި ފީފާ ފެންވަރުގެ ސްޓޭޑިއަމެއް އެޅުމުގެ މަސައްކަތް މިހާރު ދަނީ ކުރަމުންނެވެ.

ކޮލިފައިންގައި ރާއްޖޭން ކުޅެން ހަމަޖެހިފައިވާ ހަ މެޗުގެ ތެރެއިން ފުރަތަމަ ތިން މެޗު ކުޅޭނީ ރަށުން ބޭރުގައެވެ. މިދިޔަ މާރިޗް މަހު، ރާއްޖެ ކުޅުނު ފުރަތަމަ މެޗުގައި ވަނީ ފިލިޕީންސް އަތުން 4-1 ގެ ނަތީޖާއަކުން ބަލިވެފައެވެ.

ޓިމޯ ލެސްޓޭއާ ދެކޮޅަށް ކުޅޭ ދެވަނަ މެޗަށްފަހު ރާއްޖެ ކުޅޭ ތިންވަނަ މެޗުގައި އޮކްޓޫބަރު މަހުގެ ނުވަ ވަނަ ދުވަހު ރަށުންބޭރުގައި ނިކުންނާނީ ތަޖިކިސްތާނާ ދެކޮޅަށެވެ.