ކަރަންޓް ބިލާއި ގުޅިގެން އެއްވެސް ޝަކުވާއެއް އޮތްނަމަ ހުށައަޅަން ސްޓެލްކޯ އިން އެދިއްޖެ އެވެ.

ސްޓެލްކޯ އިން ބުނީ ކަރަންޓް ބިލާއި ގުޅިގެން އެއްވެސް ޝަކުވާއެއް އޮތްނަމަ ހުށައަޅަން އެދޭ ކަމަށެވެ. އެ ގޮތުން އެ ކުންފުނީގެ ކޮންޓެކެޓް ސެންޓަރުގެ ހޮޓްލައިނަށް ގުޅުމަށް އެދިފައިވެ އެވެ. ކޮންޓެކެޓް ސެންޓަރުގެ ހޮޓްލައިނަކީ 1545 އެކެވެ.

ނޫނީ ސްޓެލްކޯ ކެއާގެ ހިދުމަތް ހޯދޭނެ ކަމަށް ވެސް ބުންޏެވެ. ސްޓެލްކޯ ކެއާގެ ހިދުމަތް ހޯދުމަށް އެކަމަށް ހާއްސަ ކިއުއާރު ކޯޑް ސްކޭން ކުރުމަށް ވަނީ އެދިފަ އެވެ.

ސްޓެލްކޯ އިން ބުނީ ކަރަންޓް ބިލާއި ގުޅޭ މައުލޫމާތު ހޯދުމަށާއި ބިލާއި ގުޅިގެން އެއްވެސް ޝަކުވާއެއް އޮތްނަމަ ހުށައެޅޭނެ ކަމަށެވެ.

ކަރަންޓް އަގު ހެޔޮ ކުރުމުން ވެސް މެއި މަހުގެ ބިލް ބޮޑު ކަމަށް ބުނެ ބައެއް އާންމުން ޝަކުވާ ކޮށްފައިވެ އެވެ. އެކަން ވީގޮތް އެ ކުންފުނިން ވަނީ ސާފުކޮށްދީފަ އެވެ.

ސްޓެލްކޯ އިން ބުނީ އައު ޓެރިފް ރޭޓާއިއެކު ކަރަންޓު ބިލަށް އައިސްފައިވާ ބަދަލު ސާފުކޮށް ފެންނާނީ ވޭތުވެދިޔަ 3 ބިލް (ރަމަޟާން ޑިސްކައުންޓް ހިމަނާފައިވާ 2 ބިލާއި ކުރު މުއްދަތަކަށް ބިލްކޮށްފައިވާ ބިލް) ގެ ކުރިން އެ ގޭބިސީއަކަށް ބިލްކޮށްފައިވާ ބިލާއި އަޅައި ކިޔުމުން ކަމަށެވެ.

އެކަން ސާފުކޮށްދޭން އެ ކުންފުނިން ވަނީ ޕޯސްޓެއް ވެސް ކޮށްފަ އެވެ.

އެގޮތުން ޑިސެމްބަރ 2024 ނުވަތަ ޖަނަވަރީ 2025 ގެ ބިލާއި، އައު ޓެރިފް ރޭޓުން ބިލްކުރެވިފައިވާ ބިލް އަޅާ ކިޔުމުން ބިލުގެ ހަގީގީ ފަރަގު ސާފުވާނެ ކަމަށް ސްޓެލްކޯ އިން ބުންޏެވެ.