ޗެންޕިއަންސް ލީގު ފައިނަލުފައި ޕީއެސްޖީ އަތުން ތަފާތުބޮޑު ނަތީޖާއަކުން ބަލިވި އިންޓަ މިލާނުގެ ކުރީގެ ކޯޗު ސިމޯން އިންޒާގީ އެކުލަބު ދޫކޮށް ސައުދީ ޕްރޮފެޝަނަލް ލީގުގެ ކޯޗުކަމާއި ހަވާލުވެއްޖެ އެވެ.

މީޑިއާ ރިޕޯޓްތައް ބުނާގޮތުގައި އުމުރުން 49 އަހަރުގެ އިންޒާގީ އަލް ހިލާލް އާއި ގުޅުނީ ދެއަހަރު ދުވަހުގެ އެއްބަސްވުމެއްގެދަށުން 25 މިލިޔަން ޔޫރޯގެ މުސާރައަށެވެ.

މިއާއެކު އޭނާ ވެގެންގޮސްފައިވަނީ މިވަގުތު ދުނިޔޭގައިހުރި އެންމެ މުސާރަ ބޮޑު ކޯޗަށެވެ. މި ލިސްޓުގެ ދެވަނައިގައި މެންޗެސްޓާ ސިޓީގެ ކޯޗު ޕެޕް ގާޑިއޯލާ އޮތްއިރު، ތިންވަނައިގައި މިވަގުތު އޮތީ އާސެނަލްގެ ކޯޗު މިކެއިލް އާޓެޓާ އެވެ.

2021 ވަނަ އަހަރު ލާޒިއޯ ދޫކޮށް އިންޓަ މިލާނާއި ހަވާލުވި އިންޒާގީ ވަނީ އެކުލަބާއެކު އިޓާލިއަން ސުޕަކަޕް ތިންފަހަރު އަދި ކޮޕާ އިޓާލިއާ ދެ ފަހަރު ކާމިޔާބުކުރުމުގެ އިތުރުން،  މިދިޔަ އަހަރު އިޓާލިއަން ލީގު ޗެންޕިއަންކަން ވެސް ހޯދާފައެވެ. 

މީގެ އިތުރުން ފާއިތުވެދިޔަ ތިން އަހަރު ދުވަހުގެ ތެރޭގައި އިންޒާގީ ވަނީ ޔޫރަޕްގެ އެންމެ ޝަރަފްވެރި ފުޓްބޯޅަ މުބާރާތް ކަމަށްވާ ޔުއެފާ ޗެންޕިއަންސް ލީގުގެ ފައިނަލުން އެޓީމަށް ދެފަހަރު ޖާގަ ހޯދައިދީފަ އެވެ.

އިންޒާގީ ޓީމާއި ހަވާލުވުމަށްފަހު އެޓީމުން ކުޅޭ ފުރަތަމަ މުބާރާތަކީ މިމަހުގެ 15 ގައި އެމެރިކާގައި ފަށާ ކުލަބު ވޯލްޑްކަޕްގައެވެ. އަދި މުބާރާތުގެ ގުރޫޕް ސްޓޭޖުގައި އެޓީމު ކުޅޭ ފުރަތަ މެޗުގައި މިމަހުގެ 18 ވަނަ ދުވަހު އެޓީމުން ނުކުންނާނީ، ސްޕެއިންގެ ރެއާލް މެޑްރިޑާއި ދެކޮޅަށެވެ.