ރާއްޖެއަށްވުރެ ގިނައިން އަދިވެސް އިންޑިއާގެ ފަތުރުވެރިން އަވައްޓެރި ސްރީލަންކާއަށް ޒިޔާރަތްކުރާކަމަށް ތަފާސްހިސާބުތަކުން ދައްކައިފިއެވެ.

ސްރީލަންކާގެ ޓޫރިޒަމް ރިސާޗް އެންޑް ސްޓެޓިސްޓިކްސްގެ ތަފާސްހިސާބުތަކަށް ބަލާއިރު، ހުސްވި މެއިމަހުގެ ނިޔަލަށް އިންޑިއާގެ  204,060 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 188،223 ފަތުރުވެރިންގެ އިތުރުވުމެކެވެ. ހުސްވި މެއިމަހު އެކަނިވެސް އިންޑިއާގެ 47,001 ފަތުރުވެރިން ވަނީ ލަންކާއަށް ޒިޔާރަތްކޮށްފައެވެ. މިއީ މިދިޔަ އަހަރުގެ މެއިމަހާ އަޅާބަލާއިރު 35.4 އިންސައްތައިގެ އިތުރުވުމެވެވެ.

އަވައްޓެރި އިންޑިއާއިން ރާއްޖެއަށް އަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު އުޅެނީ 55,431 ގައެވެ. 

ރާއްޖެއާ ސްރީލަންކާ އާ ދެޤައުމުގެ ޓޫރިޒަމަށް ބަލާއިރު، އެޤައުމުން ވަނީ މިދިޔަ މެއިމަހު 1 މިލިއަން ވަނަ ފަތުރުވެރިއާއަށް މަރުހަބާކިޔާފައެވެ. މެއިމަހުގެ ނިޔަލަށް ސްރީލަންކާއަށް 1,029,803 ފަތުރުވެރިން ޒިޔާރަތްކޮށްފައިވާއިރު، އެ މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ 966,358 ފަތުރުވެރިންނެވެ.

1. އިންޑިއާ: 204,060

2. ރަޝިއާ: 110,421

3. އިނގިރޭސިވިލާތް: 96,274

4. ޖަރުމަނުވިލާތް: 69,078

5. ފްރާންސް: 57,112

1. ޗައިނާ: 115,802

2. ރަޝިއާ: 105,059

3. އިނގިރޭސިވިލާތް: 98,695

4. އިޓަލީވިލާތް: 81,545

5. ޖަރުމަނުވިލާތް: 73,772

އަވައްޓެރި ސްރީލަންކާއިން ދަނީ އެޤައުމުގެ އިގްތިސާދަށް ދިމާވެފައިވާ ހީނަރުކަމުން އަރައިގަނެ، މައިގަނޑު ސިނާއަތްތައް ކުރިއެރުވުމަށް ބޮޑެތި މަސައްކަތްތަކެއް ކުރަމުންނެވެ. އެގޮތުން ލަންކާގެ ޓޫރިޒަމް މިނިސްޓްރީން ވަނީ މިހިނގާ ޖޫންމަހުގެ 26 ވަނަ ދުވަހު ޤައުމީ ފެންވަރުގައި ޓޫރިޒަމް ކުރިއެރުވުމަށްޓަކައި ހާއްސަ ކެމްޕެއިނެއް ފެށުމަށް ނިންމާފައެވެ. އެގޮތުން މި ކެމްޕެއިނުގައި ލަންކާގެ މަޝްހޫރު ފަރާތްތަކުގެ ބައިވެރިވުން ފެނިގެންދާނޭކަމަށް ސްރީލަންކާގެ ޓޫރިޒަމް ޕްރޮމޯޝަން ބިއުރޯއިން ވަނީ ބުނެފައެވެ.

ރާއްޖޭެގ ޓޫރިޒަމުންވެސް ވަނީ މަންޒިލެއްގެ ގޮތުގައި ރައްޖޭގެ ޓޫރިޒަމް އިސްތިހާރުކުރުމަށް ގިނަ މަސައްކަތްތަކެއް ފަށާފައެވެ. މީގެ ތެރޭގައި އިނގިރޭސިވިލާތުގެ ކްލަބް ލިވަޕޫލް އަދި އިންޑިއަން ޕްރިމިއާ ލީގު (އައިޕީއެލް) ކްރިކެޓް ޓީމް، މުމްބާއީ އިންޑިއަންސް އާ ގުޅިގެން ރާއްޖެ އިސްތިހާރު ކުރުމަށް ފަށާފައިވާ މާކެޓިން ކެމްޕެއިން ފާހަގަކޮށްލެވެއެވެ. ޓޫރިޒަމްގައި ރާއްޖެއާއި ލަންކާއަކީ ވާދަވެރި ދެޤައުމުކަން ފާހަގަކޮށްލެވެއެވެ.