ކުރީގެ ރައީސް މުހައްމަދު ނަޝީދާއި ޑިމޮކްރެޓްސް ޕާޓީން އެމްޑީޕީއާ ގުޅެން ނިންމުމުން، އެޕާޓީން އެކަމަށް މަރުހަބާ ކިޔައިފިއެވެ.

އެމްޑީޕީން މިރޭ ވަނީ އެޕާޓީގެ ގައުމީ މަޖިލީހުގެ ކުއްލި ނުރަސްމީ ޖަލްސާއެއް ބާއްވާފައެވެ. މި ޖަލްސާގައި އެމްޑީޕީން ވަނީ ޑިމޮކްރެޓްސް އާއި ރައީސް ނަޝީދު އެޕާޓީއާ ގުޅެން ނިންމުމުން ގަރާރެއް ހުށަހަޅާފައެވެ. މި ގަރާރަށް ޖަލްސާގައި އެވަގުތު ތިއްްބެވި ހުރިހާ މެމްބަރުންގެ ރުހުން ލިބުނެވެ. 

މިކަމާ ގުޅިގެން އެމްޑީޕީން މިރޭ ނެރުނު ބަޔާނެއްގައި ބުނީ އެޕާޓީއަކީ ޤައުމަށްޓަކައި ހަގީގީ މަސައްކަތްތަކެއް ކުރަން ބޭނުންވާ ހަމަ ކޮންމެ ބަޔަކަށްވެސް ހުޅުވާލެވިފައިވާ ޕާޓީއެއް ކަމަށެވެ. ރައީސް ނަޝީދާއެކު އަލަށް ގުޅިވަޑައިގަންނަވާ ބޭފުޅުންނާއެކު އެމްޑީޕީގެ މަސައްކަތްތައް ބާރަށް ކުރިއަށްދާނޭކަމަށް އެ ޕާޓީގެ ބަޔާނުގައި ބުންޏެވެ.

އެމްޑީޕޯގެ ބަޔާނުގައި ބުނެފައިވަނީ، ސަރުކާރުގެ އަމަލުތައް ފާލުން ނެއްޓި އެތައް ބައެއްގެ ބުރަ މަސައްކަތުން ހޯދި ޑިމޮކްރަސީ ނުރައްކަލެއްގެ ތެރޭގައި އޮތް މި ދަނޑިވަޅަކީ މުހިއްމު އިސްލާހީ މަސައްކަތްތަކެއް ކުރަންޖެހިފައިވާ ދަނޑިވަޅެއް ކަމަށެވެ. އެގޮތުން އެމްޑީޕީއާ ގުޅޭ ކޮންމެ މެމްބަރަކީވެސް ގައުމުގެ ހައްގުގައި ވަކާލާތުކުރަން ފަސްނުޖެހޭނެ މެމްބަރުންކަމަށް އެޕާޓީން ބުންޏެވެ. އެގޮތުން ސަރުކާރު ޖަވާބުދާރީ ކުރުވައި ގާނޫނުއަސާސީން ޔަގީންކޮށްދޭ ހައްގުތައް ކަށަވަރުކޮށްދިނުމުގައި އެމްޑީޕީން އަބަދުވެސް ދެމި އޮންނާނޭކަމުގެ ޔަގީންކަން އަރުވާކަމަށްވެސް އެޕާޓީން މިރޭ ނެރުނު ބަޔާނުގައި ވަނީ ބުނެފައެވެ.

ދަ ޑިމޮކްރެޓްސް ޕާޓީ އުވާލައި ކުރީގެ ރައީސް މުޙައްމަދު ނަޝީދާއި އެ ޕާޓީގެ މެމްބަރުން އަލުން އެމްޑީޕީއާ ގުޅުމަށް ޑިމޮކްރެޓްސް އިން ނިންމާފައިވަނީ އިއްޔެ ބޭއްވުނު އެ ޕާޓީގެ ޤައުމީ މަޖިލީހުގެ ޖަލްސާގައެވެ. އެކަން ހާމަކޮށް ޑިމޮކްރެޓްސްގެ ނެޝަނަލް އެސެމްބްލީން ވަަނީ އެކަމަށް އެއްބަސްވެ ގަރާރެއް ވެސް ފާސްކޮށްފައެވެ. 

ކުރިން އެމްޑީޕީގެ ރައީސްކަމުގެ މަގާމު ފުރުއްވި، ރައީސް މުހައްމަދު ނަޝީދު އެޕާޓީ ދޫކޮށްލެއްވީ، އެމްޑީޕީގެ ތެރޭގައި އުފެދިގެންދިޔަ ހިޔާލް ތަފާތުވުމެއްގެ ތެރެއިން 2023 ވަނަ އަހަރުއެވެ. އޭގެ ކުރިން ރިޔާސީ ޕްރައިމަރީ އިންތިހާބުގައި ރައީސް ސޯލިހާ ވާދަކުރައްވައި ރައީސް ނަޝީދަށް ވަނީ ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ.

ރައީސް މުޙައްމަދު ނަޝީދުގެ އިތުރުން އެޕާޓީގެ މެންބަރުން އަލުން އެމްޑީޕީއާ ގުޅެން ނިންމާފައި މިވަނީ 2028 ވަނަ އަހަރުގެ ރިޔާސީ ޓިކެޓުގެ ވާދަވެރިކަން އެމްޑީޕީ ތެރޭގައި ބޮޑުވެފައިވާ ދަނޑިވަޅެއްގައެވެ. އެމްޑީޕީ ތެރޭގައި ރިޔާސީ ޓިކެޓުގެ ވާދަވެރިކަން ބޮޑުވެފައިވާއިރު، ނަޝީދު ވަނީ ކުރިއަށް އޮތް ރިޔާސީ އިންތިހާބުގައި ވާދަކުރެއްވުމާމެދު އެމްޑީޕީގެ އިސް ބޭފުޅުންގެ ހިިޔާލުވެސް ހޯއްދަވައިފައެވެ.