ގިނަ އަދަދެއްގެ ދިވެހިން ލައްކައިން އިންވެސްޓް ކޮށްފައިވާ ޕިރަމިޑް ސްކީމެއް ކަމަށްވާ ޖެމްކިއު އިން ފައިސާ ނުނެގޭ ގޮތް ހަދައިފިއެވެ.
ރާއްޖޭގައި ޖެމްކިޔު ސްކީމްގައި ބައިވެރިވެފައިވާ މީހުންގެ މެދުގައި ހަދާފައިވާ ޓެލެގްރާމު ގްރޫޕުގައި ޖެމްކިޔު އިން ފައިސާ ނުނެގިގެން އެ ބޭނުންކުރާ މީހުން ހިތްހަމަނުޖެހުން ފާޅު ކުރަމުންދަނިކޮށް، ނުނެގޭ ސަބަބު ހާމަކޮށް، އެ ގުރޫޕު ހިންގާ ފަރާތުން ވަނީ ފޭކު ސިޓީއެއް އެ ގުރޫޕަށް ލާފައެވެ.
އެސިޓީ ފޮނުވި ކަމަށް ބުނާ އެކްޓިން ޑެޕިއުޓީ ޑިރެކްޓަރ ޖޯންސް ގިބަންސް އަކީ އެއިދާރާގައި މަސައްކަތް ވެސް ކުރާ މީހެއް ނޫންކަން މިހާރު ކަށަވަރު ވެފައިވާއިރު، ފައިސާ އިންވެސްޓް ކޮށްފައިވ ހުރި ފަރާތްތަކުން އަންނަނީ ފައިސާކޮޅު ހިފައިގެން ޖެމކިޔުގެ ވެރިން ފިލީ ކަމަށް ތުހުމަތު ކުރަމުންނެވެ.
41،000 އަށް ވުރެ ގިނަ މީހުން ތިބި މި ގުރޫޕުގައި އިންވެސްޓް ކުރި ފަރާތްތަކުން ނުރުހުން ފާޅުކުރަމުންދާއިރު، ޖެމްކިޔު ހިންގާ މީހުން އަންނަނީ ކެތެރިވުމަށް އެމީހުން ގާތު އެދެމުންނެވެ.
އަދި ފައިސާ ވިތުޑްރޯ ނުކުރެވެނީ އިންޓަނޭޝަނަލް ފައިނޭންޝަލް އިންސްޓިޓިއުޝަންތަކުން ރިވިއުއެއް ކުރިއަށް ގެންދާތީ ކަމަށާ އެއީ އާއްމު އުސޫލުން ކުރިއަށް ގެންދާ ރިވިއުއެއް ކަމަށް އެމީހުން ވަނީ ބުނެފައެވެ. ކަންކަން އާއްމު ހާލަތަކަށް އައުމުން އަނެއްކާވެސް ފައިސާ ނެގޭނެ ކަމަށް ބުނެ އިންވެސްޓްކުރި މީހުން މައިތިރި ކުރަން އެމީހުން އަންނަނީ މަސައްކަތް ކުރަމުންނެވެ.
ޖީއެމްސީއީއަކީ ވަކި އަދަދަކަށް އިންވެސްޓްކުރުމުން ކޮންމެ ދުވަހަކު ވެސް ދެ އިންސައްތަ ނުވަތަ އެއަށް ވުރެ ބޮޑު އަދަދެއްގެ ފައިސާ ލިބޭ ސްކީމެކެވެ. އެއީ، ޕިރަމިޑް ސްކީމެއްކަން މިހާރު ކަށަވަރުކުރެވިފައިވާ ކަމަށާއި އެ ކަމުގައި ޝާމިލުވާ މީހުންނަށް ފިޔަވަޅު އަޅާނެ ކަމަށް ފުލުހުން ދާދިފަހުން ބުނުމުން، އިންވެސްޓްކުރާ ފައިސާ ޑަބަލްކޮށްދޭނެ ކަމަށްބުނެ އިތުރު އިންވެސްޓަރުން ހޯދުމުގެ މަސައްކަތްވެސް ޖެމްކިޔު ހިންގާ ފަރާތުން ވަނީ ފަށާފައެވެ.
އެއާއެކު އެތައް ބަޔަކު ލުއި ލޯން ނަގައިގެންނާއި، ކްރެޑިޓް ކާޑުން އަދި ދަރަންޏަށާ އިތުރު ގޮތްގޮތުން ފައިސާ ހޯދައިގެން މި ސްކީމްގައި ވަނީ އިންވެސްޓް ކޮށްފައެވެ.
އެކައުންޓްތަކުން ފައިސާ ނުނެގޭގޮތް ވެފައި މިވަނީވެސް އޭގެ ފަހުންކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
