ގޮތް ނޭނގޭ ގޮތްގޮތަށް، އެކިފަރާތްތަކާ މުޢާމަލާތްކޮށްގެން ފައިސާ ހޯދުމަކީ އިސްލާމް ދީނުގައި ޙަރާމް ކަމެއް ކަމުގައި އިސްލާމީ ފަތުވާދޭ އެންމެ މަތީ މަޖިލީހުގެ މެންބަރު ޑރ. މޫސާ އަންވަރު ޙަސަން ވިދާޅުވެއްޖެއެވެ.

އިސްލާމީ ފަތުވާދޭ އެންމެ މަތީ މަޖިލީހުން، ހެޔޮގޮތުގައި މުދާ ހޯދުމުގެ މުހިންމުކަމުގެ މައްޗަށް އަލިއަޅުވާލައި މިއަދު މީސްމީޑިއާގައި އާއްމު ކޮށްފައިވާ ވީޑިއޯއެއްގައި ޑރ އަންވަރު ވިދާޅުވީ، ހެޔޮ ގޮތުގައި މުދާ ހޯދުމަކީ މާތް الله އަންގަވާފައިވާ ގޮތަށް މުދާ ހޯދުން ކަމަށެވެ.

”މީހެއްގެ ހައްގަކަަށް އަރައި ނުގަނެ، އަޅުގަނޑުމެންގެ މުދާ، ހަލާކުގެ ތެރެއަށް އެއްލައި ނުލާ، ރަނގަޅު ގޮތުގައި މުދާ ހޯދުން.“ ޑރ. އަންވަރު ވިދާޅުވިއެވެ. 

މިއާއެކު، މާތް الله ކީރިތި ޤުރުއާނުގައި ދަރިންނާއި މުދަލަކީ ފިތުނައެއް ކަމުގައި ވަޙީ ކުރައްވާފައިވާކަން ފާހަގަކުރައްވައި ޑރ. އަންވަރު ވިދާޅުވީ، އެފަދައިން ވަޙީ ކުރައްވާފައިވަނީ، މާތް الله ނަހީ ކުރައްވާފައިވާ ގޮތުގައި މުދާ ހޯދާތީ ކަމަށެވެ.

ޑރ އަންވަރު އިތުރަށް ވިދާޅުވީ، މާތް اللهއާއި، އެކަލާނގެ ރަސޫލުންނާއި ނަބީންވެސް އަހަރެމެންނަށް އަންގަވާފައިވަނީ ޙަލާލް ގޮތުގައި މުދާ ހޯދައިގެން ޙަލާލް ގޮތިގައި ކެއުމަށް ކަމަށެވެ. 

އެހެންކަމުން، ތިމާގެ ދަރިންނާއި، އަނބިންނާއި، ގާތްތިމާގެ މީހުންނަށް ކާންބޯން ދޭއިރު، އެ ދޭ ތަކެއްޗަކީ ތިމާ ކިހިނެއް ކޮން ގޮތަކަށް ހޯދި ތަކެތިތޯ ޤިޔާމަތްދުވަހުން މާތް الله ސުވާލުކުރައްވާނެކަން ދަންނަންޖެހޭ ކަމަށް ވިދާޅުވިއެެވެ. 

ވުމާއެކު ގޮތް ނޭނގޭ ވަސީލަތްތައް ބޭނުންކޮށް، ގޮތްނޭނގޭ ތަންތަނުގައި އިންވެސްޓް ކުރުމުގެ ބަދަލުގައި، ޙަލާލު ގޮތުގައި މުދާ ހޯދައިގެން ތިމާގެ އަނބިދަރިންނަށް ކާންބޯން ދިނުމަށް ޑރ. އަންވަރު ވަނީ ނަޞޭޙަތްތެރިވެފައެވެ.