ދުނިޔެ މިހާރު ތިންވަނަ ބޮޑު ހަނގުރާމައަކާ ދިމާއަށް ދަތުރުކުރަމުންދާކަމަށް ވިދާޅުވެ، ރަޝިޔާގެ ރައީސް ވްލަޑިމިއަރ ޕުޓިން، ކަންބޮޑުވުން ފާޅުކުރައްވައިފިއެވެ.

ޕުޓިން މިހެން ވިދާޅުވެފައިވަނީ ހުކުރު ދުވަހު ސެއިންޓް ޕީޓަސްބާގްގައި ބޭއްވި އިޤްތިޞާދީ ފޯރަމެއްގައި ވާހަކަދައްކަވަމުންނެވެ. 

އެގޮތުން ޕުޓިން ވިދާޅުވީ ދުނިޔޭގައި ބޮޑު ހަނގުރާމައެއް ފެށިދާނެ އެތައް ކަމެއް އެބަހުރި ކަމަށާއި، އެފަދަ ކަންކަން އިތުރުވަމުންދާ ކަމަށެވެ. އެގޮތުން، ރަޝިޔާ-ޔޫކްރެއިން ހަނގުރާމައަކީ ދުނިޔޭގެ ސަލާމަތަށް ބޮޑު ނުރައްކަލެއް ކަމަށް އެމަނިކުފާނު ފާހަގަކުރެއްވިއެވެ.

މީގެ އިތުރުން، އިޒްރޭލާއި އީރާނާ ދެމެދު ހިނގަމުންދާ ކޯޅުމާއި، ހަނގުރާމައަކީވެސް ބޮޑު ކަންބޮޑުވުމެއް ކަމަށް ޕުޓިން ވިދާޅުވިއެވެ.

ޕުޓިން ވަކި ހާއްސަކޮށްވަނީ ރަޝިޔާގެ މާހިރުން އީރާނަށްޓަކައި ދެ އާ ނިއުކްލިއަރ ރިއެކްޓަރ ހަދަމުންދާ ނިއުކްލިއަރ މަރުކަޒުތަކުގެ ވަށައިގެން ހިނގަމުންދާ ކަންކަމާ ގުޅިގެން ކަންބޮޑުވެވަޑައިގަންނަވާކަން ފާހަގަކުރައްވާފައެވެ.

މިފަދަ ހަމަނުޖެހުންތައް އިތުރުވުމަކީ ދުނިޔޭގެ ސުލްހައާއި އަމާންކަން ނަގާލާނެ ކަމެއް ކަމަށް އެމަނިކުފާނު ވަނީ އިޝާރާތް ކުރައްވާފައެވެ.

"މިއީ ކަންބޮޑުވާންޖެހޭ ކަމެއް. މިއީ ޖޯކެއް ނޫން. އެއްވެސް ޝައްކެއްނެތް، މިތާނގައި ވަރަށް ގިނަ ހަމަނުޖެހުމުގެ ފުރުސަތުތަކެއް އެބަހުރި. އެ ފުރުސަތުތައް ދަނީ އިތުރުވަމުން. އަދި އެކަންކަން ވަމުން އެދަނީ އަޅުގަނޑުމެންގެ ކުރިމަތީގައި. އެކަންކަމުގެ އަސަރު ސީދާ އަޅުގަނޑުމެންނަށް ކުރަމުން އެބަދޭ،" ޕުޓިން ވިދާޅުވިއެވެ.

ޕުޓން ވިދާޅުވީ، އެ ކަންތައްތަކަށް ސަމާލުކަން ދިނުމުގެ އިތުރުން، ހައްލުތައް ހޯދުމަށް މަސައްކަތްކުރަން ޖެހޭ ކަމަށެވެ. އެގޮތުން ހުރިހާ ޤައުމަކުންވެސް، ވީ މިންވަރަކުން ސުލްހަވެރި ހައްލުތައް ހޯދުމަށް މަސައްކަތްކުރަން ޖެހޭ ކަމަށް އޭނާ ވިދާޅުވިއެވެ.