މި ޤައުމު އަމާން ބަނދަރަކަށް ގެންގޮސްދިނުމަށް އެމްޑީޕީން ކުރިއަށް ދާނީ ޕާޓީގެ ސަފުތައް ހަރުދަނާކޮށް އެކަތިގަނޑެއްގެ ގޮތުގައި ކަމަށް ކުރީގެ ރައީސް އަދި އެމްޑީޕީގެ ލީޑަރ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
އެމްޑީޕީ އަށް 20 އަހަރު ފުރުމުގެ މުނާސަބަތުގައި މިއަދު އެކްސްގައި ކުރި ޕޯސްޓެއްގައި ޞާލިޙް ވަނީ، އެ ޕާޓީގެ އެންމެހާ މެންބަރުންނަށާއި އަދި ޕާޓީއަށް ތާއީދު ކުރާ އެންމެހާ ފަރާތްތަކަށް މަރުހަބާ ވިދާޅުވެފައެވެ.
އެމްޑީޕީ އަކީ ހިތްވަރާއި، އިޞްލާޙާއި އަދި ތަހުޒީބީ ޚިޔާލާއެކު ރާއްޖެއަށް ޑިމޮކްރަސީ ތަޢާރަފް ކުރުމުގެ ފަޙުރުވެރި ޕާޓީ، އިންސާނީ ހައްގުތަކާއި، ސިޔާސީ މިނިވަންކަމާއި ވެރިކަމުގެ އެންމެހާ ކަންކަމުގައި ރައްޔިތުން ބާރުވެރި ކުރުމުގައި ފުރުސަތު ފަހިކޮށްދިން ޕާޓީ.
ރައީސް އިބްރާހިމް މުޙައްމަދު ޞާލިޙް
ރައީސް ޞާލިޙް އިތުރަށް ވިދާޅުވީ، ރައްޔިތުންނަށް ތަނަވަސްކަމާއި ފާގަތިކަން ހޯދައިދޭން އެމްޑީޕީން 20 އަހަރުކުރިން ފެށި ދަތުރު އަދި ނުނިމޭ ކަމަށާ، ކުަރަން ހުރި ކަންކަން ވަރަށް ގިނަ ކަމަށެވެ.
ޚުދުމުޚުތާރު ގޮށްމުށްތަކުގެ ދަށަށް ޤައުމު އަނބުރާ ހިނގައިދާނެކަމުގެ ބިރު ބޮޑުވެފައިވާ މި ދަނޑިވަޅުގައި، ޤައުމު އަމާން ބަނދަރަކަށް ގެންގޮސްދިނުމަށް އެމްޑީޕީން ކުރިއަށް ދާނީ ޕާޓީގެ ސަފުތައް ހަރުދަނާކޮށް އެކަތިގަނޑެއްގެ ގޮތުގައި.
ރައީސް އިބްރާހިމް މުޙައްމަދު ޞާލިޙް
އެމްޑީޕީއަށް 20 އަހަރު ފުރުން ފާހަގަކުރަން އެޕާޓީން ވަނީ މުޅި އަހަރަށް ދެމިގެންދާ ގޮތަށް ގިނަ ހަރަކާތްތަކެއް ރާވާލާފައެވެ. އެގޮތުން، މިއަދު ހަރަކާތްތައް ފަށާފައިވަނީ ހެނދުނު ސަޔާއިއެކު ދިދަ ނެގުމުގެ ހަރަކާތަކުންނެވެ.
އެފަހުން، އަހަރީ ދުވަހުގެ ކޭކުފެޅުން ބާއްވާފައިވާއިރު، އެމްޑީޕީ މެންބަރުންގެ މެދުގައި ފުޓްސަލް މުބާރާތެއް ބޭއްވުމަށްވެސް ވަނީ ހަމަޖެހިފައެވެ. އަދި ޒުވާނުންގެ ރޫހުގެ ފަރާތުން ”ލައުޑް އެންޑް ލޯކަލް“ ޕޮޑްކާސްޓެއް ވެސް މިރޭ ކުރިއަށް ދާނެ ކަމަށް އެ ޕާޓީން ބުނެއެވެ.
Advertisement
This content is created and paid for by advertisers and does not involve Voice Journalists
