މާލެއިން ފުރައިގެން ޅ. އަތޮޅަށް ދަތުރުކުރަނިކޮށް ކާށިދޫ ކަނޑަށް އިއްޔެ ބަންޑުން ޖަހާލި ލޭންޑިން ކްރާފްޓުން ގެއްލުނު މީހާ އަދިވެސް ނުފެންނަ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)އިން މިއަދު ބުނެފިއެވެ.

އެމްއެންޑީއެފުން ބުނެފައިވާގޮތުން، މާލެއިން ފުރައިގެން ދަނިކޮށް ސިވެކްގެ "އެލްސީ 308" ލޭންޑިންގ ކްރާފްޓު ބަންޑުން ޖާހާލީ ޅ.ކުރެންދޫގެ ހުޅަނގު ދެކުނުން 4 މޭލު ބޭރުންނެވެ.

އެ އުޅަނދުން ހަ މީހުން ދަތުރުކުރި ކަމަށާއި އޭގެތެރޭގައި ހިމެނެނީ ތިން ސިފައިންނާއި ތިން ބިދޭސީން ކަމަށް އެމްއެންޑީއެފުން ބުންޏެވެ. އޭގެ ތެރެއިން 4 މީހަކަށް ވަނީ ޅ.އަތޮޅު ހޮސްޕިޓަލުން ފަރުވާދީފައެވެ.

އަނެއް ދެމީހުން ގެއްލިގެން ހޯދަމުން ދަނިކޮށް އެކަކު ފެނުނުއިރު އޮތީ ނިޔާވެފައެވެ. އެއީ ސިފައިންގެ މީހެއް ކަމަށްވާ، ތ. ހިރިލަންދޫ، ސީރީނުގެ، ވޮރަންޓް އޮފިސަރު ދޭއް، އަލީ ހާމިދެވެ.

އެމްއެންޑީއެފުން މިއަދު ބުނީ ގެއްލުނު މީހާ، ހޯދުމުގެ މަސައްކަތް އަދިވެސް ކުރަމުންދާ ކަމަށާ އަދިވެސް ނުފެންނަ ކަމަށެވެ.  

އެ ހާދިސާގައި ނިޔާވި ހާމިދު ވަނީ ދިވެހި އަސްކަރިއްޔާއަށް 27 އަހަރު ޚިދުމަތްކުރައްވައިފައެވެ. ހާމިދުގެ ޖަނާޒާ ރަސްމީ އިއްޒަތުގައި ރޭ ވަނީ ބާއްވާފައެވެ.