މި އަހަރު މުދަލު ޒަކާތުގެ ގޮތުގައި ފަގީރުންނާއި މިސްކީނުންގެ ގޮތުގައި ރަޖިސްޓްރީވެފައިވާ ފަރާތްތަކަށް، ބޮލަކަށް 5،000 ރުފިޔާގެ މަގުން މުދަލު ޒަކާތް ބަހައިފިއެވެ.

ރާއްޖޭގައި މިވަގުތު ވެސް 2،852 މީހުން ފަގީރުންގެ ލިސްޓުގައި ރަޖިސްޓްރީވެފައިވެއެވެ. އޭގެތެރެއިން ބޮލަކަށް 5،000 ރުފިޔާގެ މަގުން މުދަލު ޒަކާތް ބަހާފައިވާނެކަމަށް އިސްލާމިކް މިނިސްޓްރީން ބުނެފައިވެއެވެ. ފާހަގަކޮށްލަންޖެހޭ ގޮތުގައި މި އަހަރު މުދަލު ޒަކާތުގެ ގޮތުގައި ފަގީރުންނާއި މިސްކީނުންގެ ދަފްތަރުގައި ރަޖިސްޓްރީ ވެފައިވާ ފަރާތްތަކަށް ޖަމާކޮށްފައިވަނީ ޖުމްލަ 14،260،000 ރުފިޔާއެވެ.

ރާއްޖޭގައި މުދަލުގެ ޒަކާތް ނެރުން ވާޖިބުވާ ނިސާބު ކަނޑައެޅުމުގައި ބަލަނީ ރަންރިހީގެ އަގުންނެވެ. އެގޮތުން އެ މީހެއްގެ މިލްކިއްޔާތުގައި ނިސާބު ހަމަވާ އަދަދަށް އަތުގައި ނުވަތަ ބޭންކުގައި ފައިސާ ހުރިނަމަ އަހަރެއް ފުރުމުން އޭގެ 2.5 އިންސައްތަ މުދަލު ޒަކާތުގެ ގޮތުގައި ނެރުން ވާޖިބުވާނެއެވެ.

ޒަކާތު ހައުސިންގ އިން މުދަލު ޒަކާތުގެ ނިސޯބަށް މިދިޔަ އަހަރުގެ މެއި މަހުގެ ތެރޭގައި ވަނީ ބަދަލު ގެނެސްފައެވެ. އެއީ 9،353.40 ރުފިޔާއެވެ. އޭގެ ފަހުން ޒަކާތު ހައުސިންގ އިން މިދިޔަ އަހަރުގެ އޮކްޓޯބަރު މަހުގެ 10 ވަނަ ދުވަހު ވަނީ މުދަލު ޒަކާތުގެ ނިސާބު 9240.35 ރުފިޔާއަށް ދަށްކޮށްފައެވެ.

މުދަލު ޒަކާތް އިސްލާމިކް މިނިސްޓްރީ މެދުވެރިކޮށް ކުރިން ދައްކަންޖެހުނު ނަމަވެސް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް 2016 ވަނަ އަހަރުން ފެށިގެން މުދަލު ޒަކާތް ބަލައިގަތުން ވަނީ ބަދަލުކުރެވިފައެވެ.