އިސްލާމީ ޤައުމުތަކުގެ ވެރިން އެއްބައިވަންތަ ބަޔަކަށް ވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގޮވާލައްވައިފިއެވެ. 

އިސްލާމީ ޤައުމުތަކުގެ ވެރިންނަށް މިމޭރުމުން ރައީސް ޑރ.މުއިއްޒު ގޮވާލައްވާފައިވަނީ މިއަދު ފާހަގަކުރަމުންދާ ހިޖުރީ އައު އަހަރުގެ މުނާސަބަތުގައި އެޤައުމުތަކުގެ ވެރިންނަށް ފޮނުއްވެވި ތަހުނިޔާގެ މެސެޖުގައެވެ.

ރައީސުލްޖުމްހޫރިއްޔާ ފޮނުއްވި ތަހުނިޔާގެ މެސެޖުގައި ދިވެހި ސަރުކާރާއި ރައްޔިތުންގެ ނަމުގައި، މި ފެށުނު އައު އަހަރަކީ ސުލްހަވެރި އަދި އުފާ ފާގަތި އަހަރަކަށްވުމަށް އެދިވަޑައިގެން މާތްﷲގެ ރަޙުމަތާއި ތެދުމަގު އެންމެހައި މުސްލިމް ޤައުމުތަކަށް ދެއްކެވުން އެދިވަޑައިގެން ދުޢާ ކުރައްވާފައިވެއެވެ. 

ރައީސުލްޖުމްހޫރިއްޔާ ފޮނުއްވި މެސެޖުގައި، އިސްލާމީ ޤައުމުތަކުގެ ވެރިން ފަލަސްޠީނުގެ ރައްޔިތުންނާއެކު އެއްބައިވަންތަ ވުމަށް ވަނީ ގޮވާލައްވާފައެވެ. އަދި ފަލަސްތީނުގެ ހުޅަނގުގެ އައްސޭރި އާއި ޣައްޒާއަށް ކުރިމަތިވެފައިވާ ދަތިތަކަށް ލުޔެއް ހޯދައިދިނުމަށް އޯގާތެރިކަމާއި އަޒުމާއެކު މުޅި އިސްލާމީ ދުނިޔެ ގުޅިގެން ކުރަމުން އަންނަ މަސައްކަތްތައް މިހާރަށްވުރެ ބޮޑަށް އިތުރަށް ހަރުދަނާ ކުރުމަށް ވެސް ރައީސް މުއިއްޒު ވަނީ އެދިވަޑައިގެންފައެވެ.

މި މެސެޖުގައި، ފަލަސްޠީނުގެ މިނިވަން އަދި އިސްތިގުލާލީ ދައުލަތެއް ގާއިމުކުރެވި، އިރުމަތީ ޤުދުސްއަކީ ފަލަސްޠީނުގެ ވެރިރަށް ކަމުގައި ހެދުމަށް ރާއްޖެއިން އަބަދުވެސް އެއްބާރުލުން ދޭނެކަމުގެ ޔަގީންކަން ވެސް ރައީސުލްޖުމްހޫރިއްޔާ ވަނީ ދެއްވާފައެވެ.