"ފުލުހަކާއެކު ކޮފީއެއް" ހަރަކާތް ފަސްކޮށްފި
މޫސުން ގޯސްވުމުގެ ސަބަބުން "ފުލުހަކާއެކު ކޮފީއެއް"ގެ ނަމުގައި މިއަދު ބޭއްވުމަށް ހަމަޖެހިފައިވާ ހަރަކާތް ފަސްކޮށްފިއެވެ.
ފުލުހުން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ މި ހަރަކާތް ފަސްކުރީ، މޫސުން ގޯސްވުމުގެ ސަބަބުންކަމަށެވެ. އަދި މި ހަރަކާތް އެހެން ދުވަހަކަށް ތާވަލްކުރާނޭކަމަށް ފުލުހުން ވަނީ ބުނެފައެވެ.
ދިވެހި ފުލުހުންގެ ޚިދުމަތުން ބުނެފައިވާ ގޮތުގައި މި ހަރަކާތަކީ ސިލްސިލާކޮށް ކުރިއަށްގެންދިޔުމަށް ހަމަޖެހިފައިވާ ހަރަކާތެކެވެ.
ފުލުހުން ވަނީ މިދިޔަ އަހަރުގެ ނޮވެމްބަރު މަހުވެސް "ވޯކް އެންޑް ޓޯކް" ގެ ނަމުގައި މިފަދަ ހަރަކާތެއް ކުރިއަށް ގެންގޮސްފައިވެއެވެ. މި ހަރަކާތުގައި ގިނަ ބައެއްގެ ބައިވެރިވުން ލިބިފައިވާ ކަމަށާއި، ހުޅުވިގެންވާ މާހައުލެއްގައި ފުލުހުންނާއެކު މުހިންމު މަޝްވަރާތަކެއް ކުރެވުނު ކަމަށް ފުލުހުން އޭރު ބުނެފައިވެއެވެ.
މި ހަރަކާތުގެ އެންމެ ބޮޑު އެއް މަގުސަދަކީ ރައްޔިތުންގެ އިތުބާރު ހޯދައި، ފުލުހުންނާއި މެދު އޮންނަ ގުޅުން އިތުރަށް ބަދަހިކުރުމެވެ.
Advertisement
This content is created and paid for by advertisers and does not involve Voice Journalists
