އެފްއޭއެމްގެ އާ އަސާސީ ގަވާއިދާައެކު އެ އެސޯސިއޭޝަނުގެ ރައީސްކަމަށް ކުރިމަތިލުމުގެ ފުރުސަތު ކުރީގެ ރައީސް ބައްސާމް އަދީލް ޖަލީލަށް ބަންދުވެއްޖެ އެވެ.

އެފްއޭއެމް އިން އިއްޔެ އެ އެސޯސިއޭޝަން އިންތިޚާބުގައި ވާދަ ކުރުމުގެ ފުރުސަތު ހުޅުވާލައިފައިވާއިރު، އިންތިޚާބުގައި ވާދަ ކުރުމަށް ފޯމު ހުށަހެޅުމުގެ މުއްދަތު ހަމަވާނީ ޖުލައި މަހުގެ ހަ ވަނަ ދުވަހު އެވެ.

އެފްއޭއެމްގެ އިއުލާންގައި ބުނެފައިވާގޮތުން އިންތިޚާބު ކުރަން ހަމަޖެހިފައިވަނީ އެ އެސޯސިއޭޝަންގެ ރައީސް، އެއް ފަސްޓް ނައިބު ރައީސް، ދެ ނައިބު ރައީސުން އަދި ހަތް އޯޑިނަރީ މެމްބަރުންނެވެ.

އަދި އެ އިއުލާނުގައި ވަނީ އިންތިހާބަށް ކުރިމަތިލާ ކެންޑިޑޭޓުންގެ ކިބައިގައި ހުންނަންޖެހޭ ޝަރުތަކެއް ހިމަނައިފަ އެވެ. 

އޭގެ ތެރޭގައި، މަގާމުތަކަށް ކުރިމަތިލާ ފަރާތުގެ އެއްވެސް ޖިނާއީ އަދި މަދަނީ މައްސަލައެއް އޮވެގެން ނުވާނެ އެވެ. އަދި އެފަދަ ޙުކުމެއް އެއްވެސް ޝަރުއީ ކޯޓަކުން ކޮށްފައިވާ މީހަކަށް ވެގެން ނުވާނެ އެވެ.

މީގެ އިތުރުން ފީފާގެ އެތިކްސް ކޮމިޓީ ނުވަތަ ކުޅިވަރުގެ އެހެން ޖަމިއްޔާއަކުން ކުށް ސާބިތުވެ ނުވަތަ ހުކުމް ކޮށްފައި ނުވުންވެސް ޝަރުތުތަކުގެ ތެރޭގައި ހިމެނެއެވެ. 

މިފަދައިން ޝަރުތުކޮށްފައިވާއިރު، ބައްސާމްގެ މައްޗަށް ފީފާގެ މިނިވަން އެތިކްސް ކޮމިޓީން ބައްސާމަށް ނުވަ މަސް ދުވަހުގެ ސަސްޕެންޝަނެއް ދީފައިވާއިރު އެ މައްސަލަ އިސްތިއުނާފު ކުރަން ދުނިޔޭގެ ކުޅިވަރު އާބިޓްރޭޝަން ކޯޓު (ކާސް) އަށް ހުށަހެޅުމުން އެ ކޯޓުން ވެސް ހުކުމް ކުރީ އޭނާއާ ދެކޮޅަށެވެ. އެހެންކަމުން، އެފްއޭއެމްގެ ރައީސް ކަމަށް އޭނާއަށް ކުރިމަތި ނުލެވޭނެއެވެ. 

އެފްއޭއެމްގެ އިއުލާނުގައިވާގޮތުން، އެ އެސޯސިއޭޝަންގެ އިންތިޚާބުގައި ކުރިމަތިލާ ފަރާތަކުން، އެފްއޭއެމްގެ މެމްބަރު ކުލަބު ތަކުގެ ތެރެއިން ފަސް ކުލަބެއްގެ ތާއީދު ސިޓީ ހުށަހަޅަން ޖެހެ އެވެ. އޭގެ ތެރޭގައި ފުރަތަމަ ޑިވިޝަންގެ ދެ ކުލަބު ހިމެނެން ޖެހޭނެ އެވެ.

މިދިޔަ އަހަރުވެސް ދެ ފަހަރު އެފްއޭއެމްގެ އިންތިޚާބު ބާއްވަން ވަނީ އިއުލާން ކޮށއފައެވެ. އެ ދެފަހަރުވެސް އިންތިހާބުގައި ބައްސާމް ވާދަ ކުރިއިރު، ފީފާއިން ވަނީ އެ އިންތިހާބު ހުއްޓުވާފައެވެ.