ޝީއިން އަދި ޓެމޫ ފަދަ އޮންލައިން ސައިޓުތަކުން ކުރާ ވިޔަފާރިއަށް 30 އިންސައްތައާ ހަމައަށް ފީއެއް ނަގަން ނިންމާފައިވާ ކަމަށް ބީއެމްއެލްއިން ބުނެފިއެވެ.

ޑެބިޓް ކާޑުތަކުން ރާއްޖޭން ޑޮލަރު އެންމެ ގިނައިން ބޭރުކުރެވޭ އެއްކަމަކީ އިންޓަނެޓް މެދުވެރިކޮށް ބައެއް ފަރާތްތަކުން، ސައިޓްތަކުން ވިޔަފާރީގެ ބޭނުމަށް މުދާ ގެނައުމަށް ފައިސާ ދެއްކުމެވެ. 

ބީއެމްއެލްއިމް މިއަދު ނެރުނު ނޫސް ބަޔާަނެއްބުނީ، އެގޮތަށް ފާހަގަކުރެވޭ ބައެއް މަދު ސައިޓްތަކުން (މިވަގުތު ޓީމޫ، ޝީއިން، އަލިބާބާ، އަލި އެކްސްޕްރެސް، ލަޒާޑާ އަދި އީބޭ އިން އެކަނި) ފައިސާ ދައްކާއިރު 30 އިންސައްތައާ ހަމައަށް ފީއެއް ނެގޭނެކަމަށެވެ. މި ފީ ނެގޭނީ ރުފިޔާ އެކައުންޓް ތަކުން ކުރާ ވިޔަފާރިތަކަށް އެކަންޏެވެ. 

މީގެ ތެރޭގައި ޓިކެޓް ނެގުމަށާއި ހޮޓާ ބުކް ކުރުމާއި ސަބްސްކްރިޕްޝަން ފަދަ އާންމު ބޭނުންތަކަށް ފައިސާގެ މުއާމަލާތްކުރާ ސައިޓްތައް ނުހިމެނޭ ކަމަށާަ ޑޮލަރު އެކައުންޓްތަކަށް ދޫކޮށްފައިވާ ޑެބިޓް ކާޑުތަކާއި ކްރެޑިޓް ކާޑުތައް ނުހިމެނޭ ކަމަށް އެ ބޭންކުން ބުނެފައިވެއެވެ. 

މީގެ އިތުރުން، ބޭންކުން ބުނީ ރާއްޖޭން ބޭރަށް ދަތުރުނުކުރާ ފަރާތްތަކުގެ ކާޑުތައް ވެސް ރާއްޖޭން ބޭރަށް ގެންގޮސްގެން އޭޓީއެމްތަކުން ފައިސާ ނަގަމުންދާކަން ފާހަގަކުރެވިފައިވާ ކަމަށާ، އެހެންކަމުން މުދަލާއި ޚިދުމަތުން ފައިސާ ދެއްކޭ އަދަދު އިތުރުކޮށްދިނުމާއިއެކު އޭޓީއެމްއިން ފައިސާ ނެގޭ އަދަދު 125 ޑޮލަރަށް ބަދަލުކޮށްފައިވާ ކަމަށެވެ. އަދި އޭޓީއެމުން ފައިސާ ނެގުމުން 10 ޑޮލަރު ޗާޖު ކުރެވޭނެ ކަމަށްވެސް ބުނެފައިވެއެވެ. މިފަދައިން ބަދަލު ކޮށްފައިވަނީވެސް ރުފިޔާ އެކައުންޓް ތަކުން ކުރެވޭ މުޢާމަލާތްތަކަށެވެ. 

ބީއެމްއެލް އިން މިފަދަ ފިޔަވަޅުތަކެއް އަޅާފައި މިވަނީ، ބީއެމްއެލްއިން ދުކޮށްފައިވާ ޑެބިޓް ކާޑުތަކުން ރާއްޖޭން ބޭރުގެ މުދަލާއި ހިދުމަތަށް ފައިސާ ދެއްކޭ ލިމިޓް މަހަކަށް 500 ޑޮލަރަށް ބޮޑުކުރުމަށް ފަހުގައެވެ.