ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި އިއުލާންކުރި ގެދޮރުވެރިޔާ ސްކީމްގެ  ދަށުން ދޫކުރަން ނިންމާފައިވާ 4،000 ފުލެޓު ނުދެވި ލަސްވަނީ އެ ފުލެޓް ތަކުގެ މަސައްކަތް ނުނިމޭތީ ކަމަށާ، އެކަމާ ގުޅޭ ގޮތުން ދޮގު މައުލޫމާތު ނުފެތުރުމަށް ހައުސިން މިިސްޓަރު ޑރ. އަބްދުالله މުއްތަލިބް އިލްތިމާސްކުރައްވައިފިއެވެ.

ފުލެޓު ދިނުން ލަސްވާ ކަމަށް ވިދާޅުވެ ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހީމް (ކުޑޫ) ވަނީ މަޖިލީހުގެ މިއަދުގެ ޖަލްސާއަށް ކުއްލި މައްސަލައެއް ހުށަހަޅުއްވާފައެވެ. 

އެ ކުއްލި މައްސަލައިގައި ވަނީ ފްލެޓް ހަވާލުކުރުމުގެ އެއްވެސް މަސައްކަތެއް މިއަދާ ހަމައަށްވެސް ސަރުކާރުން ކުރިއަށް ގެންގޮސްފައި ނުވާތީ އެ ފްލެޓްތައް ލިބޭ މީހުން އިންތިހާއަށް ކަންބޮޑުވުން ފާޅުކުރަމުންދާ ކަން ފާހަގަކުރައްވާފައެވެ.

އަދި ބޯހިޔާވަހިކަމުގެ ދަތިކަމަކީ ޒުވާނުން މަސްތުވާތަކެތި ބޭނުންކުރަން ފެށުމާއި ކުށުގެ މާހައުލަށް ލެނބިގެން ދިޔުމާއި އަދި އެހެނިހެންވެސް އިޖުތިމާއީ އެތަކެއް މައްސަލަތަކެއްގެ އެންމެ ބޮޑު އަސްލު ކަމަށް ފާހަގަކުރައްވައި ފްލެޓް ހަވާލުކުރުން އިތުރަށް ލަސްކުރަމުންދާނަމަ އެ އާއިލާތަކުގެ ދިރިއުޅުމުގެ ހާލަތު ނިކަމެތިވެ އިޖުތިމާއީ މައްސަލަތައް އިތުރުވަމުން ދާނެކަމަށް މައްސަލާގައި ބުނެފައިވެއެވެ. 

މިކަމާ ގުޅިގެން މުއްތަލިބް މީސް މީޑިއާގައި ކުރެއްވި ޕޯސްޓެއްގައި ވަނީ، އިންތިޚާބީ މަގާމުތަކުގައި ތިއްބަވާ ބޭފުޅުން މިފަދަ ޚައްސާސް މައްސަލަތަކާއި ގުޅިގެން ހަގީގަތާ ޚިލާފް ޚަބަރު ނުފެތުރުމަށް ސަމާލުވާން ޖެހޭކަމަށް ވިދާޅުވެފައެވެ.

"އަޅުގަނޑު ވަރަށް ގިނަފަހަރު ދަންނަވައިފައި ވާނީ ފްލެޓު ހަވާލު ނުކުރެވެނީ މަސައްކަތް ނުނިމޭތީ ކަމަށް އަދި ޖުލައި މަހުން ފެށިގެން މި މަސައްކަތް ނިމޭވަރަކުން ފްލެޓު ހަވާލުކުރަމުން ގެންދާނެ ކަމަށް. މަސައްކަތް ކުރަނީ ކުރިއަށް އޮތް ހަފުތާތަކުގައި އެއްބަސްވުމުގައި ސޮއި ކުރުމުގެ މަސައްކަތް އެފްޑީސީއާއި މިނިސްޓްރީ ގުޅިގެން ފަށަން،" ވަޒީރު މުއްތަލިބް ވިދާޅުވިއެވެ. 

މަޖިލީހުގެ މިއަދުގެ ޖަލްސާގައި ރިޔާސަތު ބެލެހެއްޓެވި މަޖިލީހުގެ ރައީސް އަބްދުއްރަހީމް އަބްދުالله ވަނީ މެންބަރު ކުޑޫ ހުށަހެޅުއްވި މައްސަލަ އަކީ މަޖިލީހުގެ ގަވާއިދުގައި ބަޔާންކުރާ ކުއްލި މައްސަލައިގެ ޝަރުތު ހަމަނުވާ މައްސަލައެއް ކަމަށް ވިދާޅުވެ މައްސަލަ ބޭރުކޮށްލާފައެވެ.