ރަސްމާދޫ ކައުންސިލާއި ރަސްމާދޫ ޑިވޮލަޕްމަންޓް އެސޯސިއޭޝަން (އާރުޑީއޭ) ގުޅިގެން ބާއްވާ "ރ. ވެޓަރަމްސް ފުޓްސަލް މުބާރާތް 2025" މިއަދު ހަވީރު ފެށުމަށް ތައްޔާރުވެއްޖެއެވެ.

މުބާރާތް ހުޅުވުމުގެ ގޮތުން މިއަދު ހަވީރު 16:30 ކުޅޭ ފުރަތަމަ މެޗުގައި ދުވާފަރާއި ހުޅުދުއްފާރު ވާދަކުރާއިރު، މިރޭ 20:00 ގައި ފަށާ ދެވަނަ މެޗުގައި ރަސްމާދޫ އިން ނުކުންނާނީ ރަސްގެތީމާއި ދެކޮޅަށެވެ.

01 ޖުލައި 2025 އިން 10 ޖުލައި 2025 ގެ ނިޔަލަށް ކުރިއަށް ގެންދާ މިމުބާރާތުގައި މިއަހަރު ޖުމްލަ ނުވަ ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ނުވަ ޓީމު ދެގުރޫޕަކަށް ބަހާލައިގެންނެވެ.

އެގޮތުން ގުރޫޕް އޭގައި ފަސް ޓީމު ހިމެނޭއިރު، އޭގެތެރޭގައި ހިމެނެނީ ދުވާފަރު، ހުޅުދުއްފާރު، ރަސްމާދޫ، ރަސްގެތީމު އަދި މަޑުއްވަރީ އެވެ. އަދި ގުރޫޕް ބީގައި ހަތަރު ޓީމު ހިމެނޭއިރު، އޭގެތެރޭގައި ހިމެނެނީ އިންނަމާދު، އިނގުރައިދޫ، މީދޫ އަދި މާކުރަތު އެވެ. 

މީގެ އިތުރުން މުބާރާތުގެ ގުރޫޕް ސްޓޭޖުގައި ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ސެމީ ފައިނަލުން ފުރުސަތު ލިބިގެންދާނެއެވެ.

މި މުބާރާތަކީ ރ.އަތޮޅުގެ ރަށްތަކުގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން ކުރީގެ ހުނަރުވެރި ފުޓްސަލް ކުޅުންތެރިންނަށް، ވާދަވެރި އަދި އެކުވެރި މާހައުލެއްގައި އެކުޅުންތެރިންގެ ހުނަރު ދައްކާލުމުގެ ފުރުސަތު ތަނަވަސް ކޮށްދިނުމުގެ އިތުރުން ދުޅަހެޔޮ މުޖުތަމައެއް ބިނާކުރުމުގެ މަގުސަދުގައި 39 އަހަރުން މަތީގެ މީހުނަށް ޚާއްސަކޮށްގެން ބާއްވާ މުބާރާތެކެވެ.

ނަމަވެސް މުބާރާތް އިތުރަށް ފޯރިގަދަކުރުމުގެ ގޮތުން ކޮންމެ ޓީމެއްގައި ވެސް 35 އަހަރުން މަތީގެ އެއްކުޅުންތެރިޔަކު ހިމެނުމުގެ ފުރުސަތު ވަނީ ދީފައެވެ.

މި އަހަރުގެ މުބާރާތުގެ ގޯލްޑް ސްޕޮންސަރ އެެއްގެ ގޮތުގައި އެމްޕީ އިބްރާހިމް ފަލާހް ހިމެނިވަޑައިގަންނަވާއިރު، ބްރައުންޒް ސްޕޮންސަރ އަކަށް މާޅޮސްމަޑުލު އުތުރުބުރީ ކައުންސިލް އިދާރާ ވަނީ ހަމަޖައްސާފައެވެ. 

މީގެ އިތުރުން މުބާރާތުގެ މިނީ ސްޕޮންސަރުންގެ ގޮތުގައި ހިލް މާޓް ފުލަސް، ފިޝިން ވޮލެޓް ހިމެނޭއިރު، މުބާރާތުގެ ސަޕޯޓް ސްޕޮންސަރުންނަކީ ދަ ބޫޓް ރޫމް، ޓްރީ ހައުސް، އެލަންޒާ މޯލްޑިވްސް، އަހުރާ ޕްލަސް އަދި ލިންކް ސާވިސް އެވެ. 

މުބާރާތުގެ ކިޓް އެންޑް ޕްރިންޓިންގ ޕާޓްނަރަކަށް އައިރާ ގާމެންޓްސް ހަމަޖައްސާފައިވާއިރު، ޓްރޮފީ ޕާޓްނަރަކީ ލޭޔާ އެވެ. އަދި ޑިޖިޓަލް ޕާޓްނަރަކަށް ދިރާގު ހަމަޖައްސާފައިވާއިރު، މުބާރާތުގެ އޮފިޝަލް މީޑިޔާ ޕާޓްނަރަކީ ވޮއިސް ސްޕޯޓްސް އެވެ.