މާލެ ސިޓީއިން މީހަކު ގެއްލިގެން ފުލުހުންނަށް ރިޕޯޓްކުރުމާ ގުޅިގެން އެމީހާ ހޯދުމުގެ މަސައްކަތް ދިވެހި ފުލުހުންގެ ޚިދުމަތުން ކުރަމުން އަންނަކަމަށް އެ ޚިދުމަތުން ބުނެފިއެވެ.

ފުލުހުން ހާމަކޮށްފައިވާ ގޮތުގައި ގެއްލިގެން ހޯދަމުންދަނީ ޏ.ފުވައްމުލައް. ހޯދަޑު / ބޯގަންވިލާ، ސާމީ ޢަބްދުލްޙަމީދު (34އ) އެވެ.

މި ދިޔަ ޖޫން މަހުގެ 25 ވަނަ ދުވަހުން ފެށިގެން، އޭނާގެ ހަބަރެއް ނުވެ ގެއްލިފައިވާކަމަށް އާއިލާގެ ފަރާތުން ފުލުހުންނަށް އިއްޔެ ރިޕޯޓްކޮށްފައިވާކަަމަށް ފުލުހުން ވަނީ ބުނެފައެވެ.

އާއިލާގެ ފަރާތުން ފުލުހުންނަށް މިމައްސަލަ ރިޕޯޓްކުރުމާއެކު، ފުލުހުންގެ ކަމާގުޅުންހުރި އެންމެހާ ބަހާތަކަށް މައުލޫމާތު ހިއްސާކުރެވި މީހާ ހޯދުމުގެ މަސައްކަތްކުރަމުންދާއިރު، މިހާތަނަށް ކުރެވުނު މަސައްކަތުން މީހާ ހޯދިފައިނުވާ ކަަމަށް ފުލުހުން ވަނީ އިތުރަށް ބުނެފައެވެ.

ސާމީ ޢަބްދުލްޙަމީދު އާބެހޭ އެއްވެސް މައުލުމާތެއް ލިބިފައިވާ ފަރާތެއް ވާނަމަ، ގަލޮޅު ޕޮލިސް ސްޓޭޝަނުގެ ނަންބަރު 9790092 އަށް ނުވަތަ ފުލުހުންގެ ހޮޓްލައިން 3322111 އަށް ގުޅުއްވައި އެނާ އާއި ބެހޭ މައުލޫމާތު ހިއްސާކުރުމަށް އެ ޚިދުމަތުން ވަނީ އެދިފައެވެ.