މޫސުން ގޯސްވާނެ ކަމަށް ލަފާކޮށް އުތުރުގެ އަތޮޅުތަކަށް މޫސުމާ ބެހޭ ޤައުމީ އިދާރާ (މެޓް) އޮފީހުން ހުދު ސަމާލު ނެރެފިއެވެ.

މިކަން ހާމަކޮށް މެޓް އޮފީހުން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ ހއ. އަތޮޅުން ފެށިގެން ބ. އަތޮޅާއި ހަމައަށް މޫސުން ގޯސްވުމުގެ ސަބަބުން ހުދު ސަމާލު ނެރެފައިވާކަމަށެވެ. މެޓް އޮފީހުން އެ ސަރަހައްދުތަކަށް ހުދު ސަމާލު ނެރެފައިމިވަނީ މިއަދު މެންދުރުފަހު 15:45 ކުން ފެށިގެން މިރޭ 20:00 އާއި ހަމައަށެވެ.

މި ވަގުތު ތަކުގައި އެ ސަރަހައްދަށް ގުގުރުމާއިއެކު ބޯކޮށް ވާރޭ ވެހުމުގެ އިތުރުން ގަޑިއަކު 40 ވައިގަދަވާނޭކަމަށް މެޓް އޮފީހުން ވަނީ ލަފާކޮށްފައެވެ. މީގެ އިތުރުން އެ ވަގުތުތަކުގައި ކަނޑުވެސް ގަދަވާނޭކަމަށް ވަނީ ލަފާކޮށްފައެވެ.

ކަނޑުތައް ގަދަވާނެކަމަށް ބެލެވޭތީ، މެޓް އޮފީހުން ވަނީ ހުރިހާ ފަރާތްތަކުން، ހާއްސަ ގޮތެއްގައި ކަނޑުދަތުރުކުރާ ފަރާތްތަކުން ދަތުރަށް ފެށުމުގެ ކުރިން މޫސުމާ ބެހޭ އެންމެފަހުގެ މައުލޫމާތު ހޯދުމަށްފަހު ދަތުރުކުރުމަށް އިލްތިމާސްކޮށްފައެވެ.