ދެކުނު ކޮރެއާގައި މިހާރު ކުރިއަށްދާ 21 އަހަރުން ދަށުގެ އޭޝިއާ ނެޓްބޯޅަ މުބާރާތުގެ ސެމީފައިނަލުގައި 61-39 ގެ ތަފާތުބޮޑު ނަތީޖާއަކުން ޗައިނީސް ޓައިޕޭ ބަލިކޮށް ދިވެހި ޒުވާން ޓީމު މުބާރާތުގެ ފައިނަލުން ޖާގަ ހޯދައިފިއެވެ.

މުބާރާތުގެ ސެމީފައިނަލުން ދިވެހި ޓީމު ޖާގަހޯދީ ގުރޫޕް ސްޓޭޖުގައި ކުޅުނު ފަސް މެޗުގެ ތެރެއިން ހަތަރު މެޗުން މޮޅުވެ އަށް ޕޮއިންޓާއެކު ގުރޫޕް ބީގެ ދެވަނަ ޓީމުގެ ގޮތުގައެވެ. އަދި ޗައިނީސް ޓައިޕޭ ސެމީފައިނަލުން ޖާގަހޯދީ ގުރޫޕް ސްޓޭޖުގައި ކުޅުނު ފަސް މެޗުގެ ތެރެއިން ތިން މެޗުން މޮޅުވެ ހަ ޕޮއިންޓާއެކު ގުރޫޕް ބީގެ ތިންވަނަ ޓީމުގެ ގޮތުގައެވެ.  އަދި މިދެޓީމު މުބާރާތުގެ ގުރޫޕް ސްޓޭޖުގައި ވާދަކުރި މެޗު 51-26 ގެ ނަތީޖާއަކުން ކާމިޔާބުކުރީ ދިވެހި ޓީމުންނެވެ.

މެޗުގެ ފުރަތަމަ ކުއާޓާގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި ކުއާޓަރ ނިމިގެންދިޔައީ ތިން ޕޮއިންޓްގެ ލީޑަކާއެކު 11-14 ގެ ނަތީޖާއަކުން ޗައިނީސް ޓައިޕޭ ކުރީގައި އޮވެގެންނެވެ. ނަމަވެސް ދެވަނަ ކުއާޓާގައި ރާއްޖެ ޓީމުން 18 ޕޮއިންޓް ހޯދައި މެޗުގެ ލީޑު ހޯދިއިރު، މިކުއާޓާގައި ޗައިނީސް ޓައިޕޭއަށް ސްކޯކުރެވުނީ 11 ޕޮއިންޓެވެ.

މެޗުގެ ތިންވަނަ ކުއާޓާގައި ދިވެހި ވަނީ ކުޅުން ރަނގަޅުކޮށް އެޓޭކުތައް އިތުރުކޮށްފައެވެ. އަދި މިއުކާޓާގައި ދިވެހި ޓީމުން އިތުރު 17 ޕޮއިންޓް ހޯދިއިރު، ޗައިނީސް ޓައިޕޭއަށް ސްކޯކުރެވުނީ އަށް ޕޮއިންޓެވެ. އަދި މެޗުގެ ފަހު ކުއާޓާގައި ރާއްޖެއިން އިތުރު 15 ޕޮއިންޓް ހޯދިއިރު، ޗައިނީސް ޓައިޕޭއަށް މިކުއާޓާގައި ސްކޯކުރެވުނީ އަށް ޕޮއިންޓެވެ. މިއާއެކު މެޗުގެ ކުޅުން ނިމިގެންދިޔައީ 22 ޕޮއިންޓްގެ ލީޑަކާއެކު 39-61 ގެ ތަފާތުބޮޑު ނަތީޖާއަކުން ދިވެހި ޒުވާން ޓީމު ކުރީގައި އޮވެގެންނެވެ. 

މިއަހަރުގެ މުބާރާތުގައި ޖުމްލަ 11 ޓީމަކުން ބައިވެރިވެފައިވާއިރު، މުބާރާތް ކުރިއަށްދަނީ ބައިވެރިވި އެގާރަ ޓީމު ދެ ގުރޫޕަކަށް ބަހާލައިގެންނެވެ. އެގޮތުން ރާއްޖެ ހިމެނުނީ، ދެކުނު ކޮރެއާ، ޖަޕާން، ޗައިނީސް ޓައިޕޭ އަދި ޕާކިސްތާނާ އެކު ގްރޫޕް ބީގަ އެވެ 

މިމުބާރާތުގައި ރާއްޖޭން ވާދަކުރަމުން އަންނަނީ، ތަޖުރިބާކާރު ކޯޗު، ނީޝާ ހަލީމްގެ އިތުރުން، ގައުމީ އަންހެން ޓީމުގައި ހިމެނޭ ކުޅުންތެރިންގެ މައްޗަށް އެކުލެވޭ ކޯޗިން ޓީމެއްގެ އިރުޝާދުގެ ދަށުންނެވެ. އަދި މިމުބާރާތުގައި ރާއްޖޭގެ ޒުވާން ޓީމުން އަންނަނީ ތަފާތު މޮޅު ކުޅުމެއް ދައްކަމުންނެވެ.