ބިޒްނަސް އިމޭޖް ގްރޫޕް ޕްރައިވެޓް ލިމިޓެޑުން ދައުލަތަށް ޓެކްސްގެ ގޮތުގައި މިލިއަނަކަށްވުރެ ގިނަ ރުފިޔާ ދެއްކުމަށް ސިވިލްކޯޓުން ހުކުމްކޮށްފިއެވެ.

ބިގުންދައުލަތަށް ދައްކަންޖެހޭ ޖީއެސްޓީ ނުދައްކައިގެން އެ މައްސަލަ ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީން އެ މައްސަލަ ސިވިލް ކޯޓަށް ހުށަހަޅާފައިވަނީ، 2023 ވަނަ އަހަރުގެ ޖެނުއަރީމަހުގެ ތެރޭގައެވެ. މީރާއިން ކޯޓަށް ހުށަހަޅާފައިވަނީ ބިގުން ޖީއެސްޓީގެ ގޮތުގައި ދައްކަންޖެހޭ 1،023،561.04 ރުފިޔާ ހޯދުމަށެވެ.

ޝަރިއަތުގައި ބިގުން ވަނީ އެ ފައިސާއަކީ އެކުންފުނިން ދައްކަންޖެހޭ ފައިސާއެއްކަމަށެވެ. މި މައްސަލާގެ ހުކުމްގައި ސިވިލްކޯޓުން ބިގަށް އަންގާފައިވަނީ، މިހިނގާ ޖުލައިމަހުގެ 3 ވަނަ ދުވަހުން ފެށިގެން ފަސް މަހުގެ މުއްދަތުގެ ތެރޭގައި ސިވިލްކޯޓަށް ދައްކައި ހަލާސްކުރުމަށެވެ.

ދައުލަތަށް ޓެކްސް ނުދައްކާ މައްސަލާގައި މީރާއިން ދަނީ ދައުލަތަށް ލިބެންޖެހޭ ފައިސާ ހޯދުމަށް އެކި ގޮތްގޮތުން ފިޔަވަޅުތައް އަޅަމުންނެވެ. އެގޮތުން ނޯޓިސް ފޮނުވައިގެން އިޖާބަ ނުދީފިނަމަ މީރާއިން ދަނީ އެކުންފުންޏެއްގެ މައްސަލަ ކޯޓަށް ވައްދައިގެން ދައުލަތަށް ލިބެންޖެހޭ ފައިސާ ހޯދަމުންނެވެ. މީރާއިން މިދިޔަ އަހަރު އެކަނިވެސް ޓެކްސް ބަޔާން ހުށަހެޅުމަށް ވަނީ 52،158 ފަރާތަކަށް ނޯޓިސް ފޮނުވާފައެވެ. އޭގެ ތެރެއިން އިޖާބަ ދީފައިވަނީ 4،311 ފަރާތުންނެވެ. މިދިޔަ އަހަރު ޝަރުއީ މަރުހަލާގެ ތެރެއިން 55 މައްސަލަ މީރާއާ އެއްކޮޅަށް ވަނީ ނިންމާފައެވެ.