ދުނިޔޭގެ އެންމެ ބޮޑެތި ވިޔަފާރިވެރިންގެ ތެރޭގައި ހިމެނޭ، ޓެކްނޮލޮޖީ ދާއިރާގެ މަޝްހޫރު ބިލިއަނަރ، އީލޮން މަސްކް، އާ ސިޔާސީ ޕާޓީއެއް އުފައްދައިފިއެވެ.
މަސްކް މިކަން ހާމަކޮށްފައިވަނީ އޭނާގެ މީސް މީޑިއާ ޕްލެޓްފޯމް އެކްސްގައި ކުރި ޕޯސްޓެއްގައެވެ.
"އެމެރިކާ ޕާޓީ" ގެ ނަމުގައި އުފެއްދި މިޕާޓީއަކީ، އެމެރިކާގެ ސިޔާސީ ނިޒާމުގައި މިހާރު އޮތް ރިޕަބްލިކަން އަދި ޑިމޮކްރެޓިކް ޕާޓީއަށްވެސް ބޮޑު ގޮންޖެހުމަކަށް ވާނެ ކަމަށެވެ.
ނަމަވެސް، މިޕާޓީ އެމެރިކާގެ އިންތިޚާބާބެހޭ އިދާރާތަކުގައި ރަސްމީކޮށް ރަޖިސްޓަރީކުރެވިފައިވޭތޯ ނުވަތަ ނޫންތޯ އަދި ސާފެއް ނުވެއެވެ. އަދި މިޕާޓީގެ އިސްވެރިންނަކީ ކޮބައިކަމާއި، ޕާޓީ ހިންގާނެ ގޮތާ ބެހޭ އެއްވެސް ތަފްސީލެއް މަސްކް ހާމަކޮށްފައެއް ނުވެއެވެ.
މަސްކް މިފަދަ ޕާޓީއެއް އުފެއްދުމުގެ ޚިޔާލު ފުރަތަމަ ފާޅުކޮށްފައިވަނީ، ޑޮނަލްޑް ޓްރަމްޕްއާ އޭނާއާ ދެމެދު އުފެދުނު ދެބަސްވުމުގެ ތެރޭގައެވެ. އެ މައްސަލަތަކާ ގުޅިގެން މަސްކް ވަނީ ޓްރަމްޕްގެ ސަރުކާރުގައި އޭނާ އަދާކުރަމުން އައި މަގާމުން ވަކިވެ، ޓްރަމްޕްގެ ސަރުކާރަށް ބޮޑެތި ފާޑުކިޔުންތައް އަމާޒުކުރަން ފަށާފައެވެ.
އެ ދުވަސްވަރު، މަސްކް ވަނީ، އެމެރިކާގައި އާ ސިޔާސީ ޕާޓީއެއް އުފެއްދުމަށް ތާއީދު އޮތްތޯ ބެލުމަށް އެކްސްގައި ޕޯލް އެއްވެސް ކުރިއަށް ގެންގޮސްފައެވެ.
"ދެބައިކުޅަ އެއްބަޔަށްވުރެ ގިނަ މީހުން ބޭނުންވަނީ އާ ސިޔާސީ ޕާޓީއެއް. އެކަން ވާނެ. މިގައުމުގައި އޮތީ ޑިމޮކްރަސީއެއް ނޫން. ދެޕާޓީއެއްވެސް ނޫން. އޮތީ ވަން-ޕާޓީ ސިސްޓަމެއް. އެ ސިސްޓަމުން މަސައްކަތް ކުރަނީ ގައުމު ބަނގުރޫޓު ކުރަން. އެހެންކަމުން، ގައުމުގެ މިނިވަންކަން އަނބުރާ ހޯދުމަށް ’އެމެރިކާ ޕާޓީ‘ މިވަނީ އުފައްދާފައި." މަސްކު ބުނެފައިވެއެވެ.
މަސްކު އައު ޕާޓީއެއް އުފެއްދިކަން އިއުލާން ކޮށްފައިވާއިރު، ހޮނިހިރު ދުވަހާ ހަމައަށް ވެސް، ފެޑެރަލް އިލެކްޓޯރަލް ކޮމިޝަނުން މިޕާޓީ ރަސްމީކޮށް ރަޖިސްޓަރީކުރިކަން ދައްކުވައިދޭ އެއްވެސް ލިޔެކިއުމެއް އާންމުކޮށްފައި ނުވާ ކަމަށް ސީއެންއެން އިން ރިޕޯޓް ކޮށްފައިވެއެވެ.
މަސްކަކީ 2024 ވަނަ އަހަރުގެ އިންތިޚާބުގައި ޓްރަމްޕްގެ ކެންޕެއިނުގައި އެންމެ އިސްކޮށް ހަރަކާތްތެރިވި އެކެކެވެ. އަދި އޭނާ ވަނީ ޓްރަމްޕަށް އިންތިޚާބު ކާމިޔާބު ކުރުމަށް އެހީތެރިވުމަށް 250 މިލިއަން ޑޮލަރު ޚަރަދުކޮށްފައެވެ.
Advertisement
This content is created and paid for by advertisers and does not involve Voice Journalists
