ހުސްވި ޖޫންމަހުގެ 29 ވަނަ ދުވަހުގެ ހެނދުނު މާލޭގެ ގެއަކަށް ވައްކަންކުރަން ބަޔަކު ވަދެ އެ ގެއިން ގެންދިޔަ ގިނަ އަދަދެއްގެ ތަކެތީގެ ތެރެއިން ބައެއް އެއްޗެހި ފުލުހުން ހޯދައިފިއެވެ.

މިކަމާ ބެހޭގޮތުން ފުލުހުން މިއަދު ބުނެފައިވަނީ އެ މުއައްސަސާއަށް ހުށަހަޅާފައިވާ މައްސަލައާ ގުޅިގެން އެ ތަކެތި ހޯދުމަށް ކުރަމުންދިޔަ މަސައްކަތުން، އޭގެ ތެރެއިން ބައެއް ތަކެތި ހޯދާފައިވަނީ ޖޫން 30 ވަނަ ދުވަހު ކުރިއަށް ގެންދިޔަ އޮޕަރޭޝަނުގައެވެ.

ވޮއިސްއަށް މައުލޫމާތު ލިބިފައިވާ ގޮތުގައި ފުލުހުން ހޯދި ތަކެއްޗަކީ ޕީއެސްއެމްގެ ކުރީގެ އެމްޑީ އަލީ ހާލިދު ދިރިއުޅުއްޗާ ގެއިން ގެންދިޔަ ތަކެއްޗެވެ. އެދުވަހުގެ ވައްކަމުގެ ހާދިސާއާ ގުޅޭގޮތުން އަލީ ހާލިދު ވަނީ ވަގުން އެ ގެއަށްވަދެ ވައްކަންކުރަން އުޅުނު ވީޑިއޯ ސޯޝަލް މީޑިއާގައި އާއްމުކޮށް، އެމީހުން ހޯދުމަށް އާއްމުންގެ އެހީތެރިކަމަށްވެސް އެދިފައެވެ.

ފުލުހުންގެ މަސައްކަތުން މިހާތަނަށް ހޯދިފައިވާ ތަކެތީގެ ތެރޭގައި، އައިފޯނު، ލެޕްޓޮޕް، އެކި ބްރޭންޑުތަކުގެ އަވިއައިނު، ޕްރިންޓަރު، އެކި ބްރޭންޑުތަކުގެ ހާޑު އަދި ސްޕީކަރުގެ އިތުރުން އަތުކުރީ ގަޑިއާއި އެހެނިހެން ތަކެތި ހިމެނެއެވެ. ފުލުހުން ބުނީ މި ތަކެތީގެ އަގު 60000 ރުފިޔާއަށް ވުރެ ބޮޑުވާނެ ކަމަށް ވެރިފަރާތުން މައުލޫމާތު ދީފައިވާކަމަށެވެ. އެ ގެއިން ވަގަށް ނަގާފައިވާ ތަކެތީގެ ޖުމުލަ އަގު 72000 ރުފިޔާއަށް ވުރެ ބޮޑުވާނެ ކަމަށް ވެސް ވެރިފަރާތުން މައުލޫމާތު ދީފައިވާކަމަށް ފުލުހުން ބުންޏެވެ.

ފުލުހުން ދަނީ މި މައްސަލާގައި، މިހާތަނަށް ނުފެނިވާ ތަކެތި ހޯދުމުގެ މަސައްކަތް ކުރަމުންނެވެ.